Астанада үш ауысымды мектеп мәселесі қалай шешіледі?

Елордада мектеп жасындағы 259 мың бала тұрады. Оның 27 мыңы биыл 1-сыныпқа барды. Өткен жылмен салыстырғанда биыл бала саны 22 мыңға артты. Ал үш ауысымды мектептердің мәселесі қалай шешілмек? Астанадағы Коммуникациялар қызметінде өткен брифингте қала әкімінің орынбасары Есет Байкен түсіндіріп берді, деп хабарлады turkystan.kz елорда әкімдігі сайтына сілтеме жасап. Оның айтуынша, қазір қалада үш ауысымды және шамадан тыс жүктемесі бар мектептердің мәселесін шешу жұмысы жүріп жатыр.

«Үш ауысымды және бала саны шамадан тыс мектептердің санын азайту мақсатында қазіргі уақытта қалада 14 мектептің құрылысы жүріп жатыр. Оның ішінде 11 мектеп биылғы оқу жылында пайдалануға беріледі. Оқу жылының басында 4 мектеп (1 мектеп, 1 мектептің жанынан салынған жаңа корпус, 2 жекеменшік мектеп) пайдалануға берілді. Атап айтсақ, өзекті мәселелердің бірі болған – соңғы бес жылда 3 ауысымда оқып келген №59 мектеп-лицейдің мәселесі толығымен шешілді. Мектеп жанынан 1200 оқушы орнына арналған жаңа корпус пайдалануға берілді. Сонымен қатар, биыл екі ауысымда 2400 оқушы орнына арналған №96 мектеп-гимназиясы ашылып, пайдалануға берілді. Бұл №85 мектеп-лицейінің үшаусымдық мәселесін шешті», - дейді Есет Байкен.

Мемлекет басшысының тапсырмасымен елордада «Жайлы мектеп» ұлттық жобасы жүзеге асырылып жатыр. Осы бағдарлама бойынша 2024-2025 жылдар аралығында 90 мың орындық (екі ауысымды) 24 мектеп салынады. 24 мектептің 15-сі қарқынды дамып келе жатқан Нұра мен Есіл аудандарында салынады. Осылайша, қаладағы үш ауысымда оқытатын және бала саны шамадан тыс мектептердің мәселесі толық шешімін таппақ.  

Серіктес жаңалықтары