«AMANAT» партиясы мен Қазақстан халқы Ассамблеясы қоғамдық келісім мен жалпыұлттық бірлікті нығайту үшін бірлесіп жұмыс істеуге ниетті. Соған сай ынтымақтастық туралы меморандумға бүгін «AMANAT» партиясының Атқарушы хатшысы Елнұр Бейсенбаев пен Қазақстан халқы Ассамблеясы төрағасының орынбасары Марат Әзілханов қол қойды.
«AMANAT»-тың Атқарушы хатшысы Елнұр Бейсенбаев партия әрқашан әділдік, жауапкершілік, еңбекқорлық және отбасы мұратына адалдық сияқты ортақ мызғымас құндылықтарды нығайтуды жақтайтынын мәлімдеді.
«Мемлекет басшысы Қасым-Жомарт Тоқаев атап өткендей, татулық пен келісім тек мемлекеттік саясатта емес, қоғамда, үйде, ұжымда, жалпы, барлық жерде дәріптелуі қажет. «AMANAT» парламенттік көпшілік дауысқа ие және барлық деңгейдегі мәслихаттардағы орындардың 76,9%-ын иеленген партия ретінде, дәстүрлі ахлақ қағидаларын ілгерілету, мемлекеттік тілді дамыту, әйел құқығын қорғауды қолдау үшін әлеуеті жеткілікті. Өткен тоғыз айда елімізде бұрын-соңды болмаған түбегейлі саяси реформалар жүргізіліп, Әділетті Қазақстанды құрудың іргетас қаланды. Халықтың бірлігі мен қоғамдық келісім еліміздің өркендеуінің шешуші шарты екеніне сенімдімін», - деді ол.
Қазақстан халқы Ассамблеясы төрағасының орынбасары Марат Әзілханов бүгінде ҚХА-ның негізгі міндеті – ХХХІІ сессия шешімдерінің тиімді іске асырылуын қамтамасыз ету екенін атап өтті.
«Барлығымызды біріктіретін ортақ құндылықтарды, идеяларды насихаттауымыз керек. Еліміздегі саяси партиялардың дамуы, үлкен электоралды үрдістің орын алуы, жаңа Мәжіліс пен мәслихаттардың жасақталуы – саяси реформалардың бір бейнесі. «AMANAT» партиясы – негізгі саяси күш. Біз бұған дейін де партиямен тығыз жұмыс істедік, бірлескен жұмысты әрі қарай да жалғастырамыз», - деді ол.
Меморандум патриоттық құндылықтарды қалыптастыруға және Қазақстан халқының дәстүрлерін сақтауға бағытталған бірлескен қоғамдық, мәдени-бұқаралық және ғылыми-тәжірибелік іс-шараларды өткізуді көздейді. Тараптар, сондай-ақ, халықтың құқықтық мәдениетін арттыруға және қоғамдық келісім мен жалпыұлттық бірлікті дамытуға бағытталған бірлескен диалог алаңдарын ұйымдастыру туралы уағдаласты.
Айта кетейік, партия сайлауалды бағдарламасы аясында театрлар, кітапханалар, коммуникациялық, білім беру және демалыс орталықтарын қоса алғанда, еліміз бойынша жыл сайын үш жүз мәдениет нысанының құрылысы мен жаңғыртылуын қамтамасыз етуді жоспарлап отыр. Сонымен қатар, мәдениет, мұрағат және кітапхана қызметкерлерінің жалақысы екі есеге артады.
Еске салсақ, Қазақстан халқы Ассамблеясының «Әділетті Қазақстан: бірлік, тұрақтылық, даму» атты ХХХІІ сессиясында Мемлекет басшысы Қасым-Жомарт Тоқаев ұлт бірлігін нығайту және этносаралық қатынастарды үйлестіру жөніндегі мемлекеттік саясаттың негізгі аспектілеріне тоқталған бағдарламалық сөз сөйледі.
«AMANAT»-тың Атқарушы хатшысы Елнұр Бейсенбаев партия әрқашан әділдік, жауапкершілік, еңбекқорлық және отбасы мұратына адалдық сияқты ортақ мызғымас құндылықтарды нығайтуды жақтайтынын мәлімдеді.
