«ناۋقاس» بالانىڭ ەمىنە دەپ حالىقتان اقشا جيناعان قىزدار ۇستالدى (ۆيدەو)

الماتىدا «ناۋقاس» بالانىڭ ەمىنە اقشا جيناعان ەكى قىز ۇستالدى دەپ حابارلادى turkystan.kz Polisia.kz-كە سىلتەمە جاساپ.

22 جانە 23 جاستاعى قىزدار الەۋمەتتىك جەلى ارقىلى الاياقتىق جاسادى دەگەن كۇدىكپەن ۇستالدى. بارلىعى بەلگىلى بلوگەردىڭ الاياقتىق تۋرالى اۋەزوۆ اۋداندىق پوليتسياسىنا ارىزدانۋىنان باستالعان.

ونىڭ ايتۋىنشا، ەكى بويجەتكەن ناۋقاس بالاعا كومەك سۇراي وتىرىپ، قولدان جاسالعان قۇجاتتاردى پايدالانىپ، پاراقشاسىنا پوست جاريالاۋعا كوندىرگەن. بلوگەردىڭ ۇلكەن اۋديتورياسى جاناشىرلىق تانىتىپ، كومەككە شاقىرۋدى نازاردان تىس قالدىرماي، بەلسەندى تۇردە قاراجات اۋدارا باستايدى.

– قابىلدانعان شارالاردىڭ قورىتىندىسى بويىنشا وسى قىلمىسقا كۇدىكتىلەر انىقتالدى جانە ۇستالدى. ولار — اقمولا وبلىسىنىڭ تۇرعىندارى. العاشقى جاۋاپ الۋدا قىزدار ءوز ءىس-ارەكەتتەرىن مويىندادى. اتالعان دەرەك بويىنشا تەرگەۋ امالدارى جۇرگىزىلءىپ جاتىر، – دەدى اۋەزوۆ اۋداندىق پب-نا قاراستى پوليتسيا ءبولىمى باستىعىنىڭ ورىنباسارى تيمۋر مۋلينوۆ.

كۇدىكتىلەردىڭ ءبىرى سپورتشى، تاەكۆوندومەن اينالىسقان. بۇرىن ونىڭ زاڭمەن ماسەلەلەرى بولعان جانە ۇرلىق ءۇشىن جاۋاپقا تارتىلعان. ونىڭ قۇربىسى س. ەسىمدى ازاماتشا – مانيكيۋر جاساۋ شەبەرى. قازىر تەرگەۋشىلەر بۇل دەرەكتەن باسقا دا ەپيزودتار بار-جوعىن انىقتاپ جاتىر.

ۇقساس جاڭالىقتار

Back to top button