ەلىمىزدىڭ ساۋىقتىرۋ لاگەرلەرىندە 1 ملن-نان استام وقۋشى دەمالىپ جاتىر

جازعى دەمالىستىڭ ءبىرىنشى ماۋسىمىندا 1 ميلليوننان استام قازاقستاندىق وقۋشى ساۋىقتىرۋ لاگەرلەرىندە دەمالىپ جاتىر. بالالارعا ارنالعان قالا سىرتىنداعى، مەكتەپ جانىنداعى، كيىز ءۇي جانە شاتىر لاگەرلەرى جۇمىس ىستەيدى دەپ حابارلادى turkystan.kz.

وقۋ-اعارتۋ مينيسترلىگىنىڭ مالىمەتىنشە، بالالاردى ساۋىقتىرۋ مەكەمەلەرىندە ەڭ الدىمەن جان باسىنا شاققانداعى ورتاشا تابىسى ەڭ تومەنگى كۇنكورىس دەڭگەيىنەن تومەن،  ياعني مەملەكەتتىك اتاۋلى الەۋمەتتىك كومەك الاتىن وتباسىلاردىڭ بالالارى تەگىن دەمالادى. سونداي-اق جەتىم بالالارعا، اتا-اناسىنىڭ قامقورلىعىنسىز قالعان بالالارعا جانە توتەنشە جاعدايلار سالدارىنان شۇعىل كومەككە مۇقتاج وتباسىلاردان شىققان بالالارعا تەگىن جولدامالار بەرىلەدى. بالالاردىڭ قالا سىرتىنداعى لاگەرلەردە دەمالۋىن جانە ساۋىقتىرىلۋىن قارجىلاندىرۋ جەرگىلىكتى بيۋدجەت ەسەبىنەن قامتاماسىز ەتىلەدى.

«ءار بالالار لاگەرىنىڭ ءوز باعدارلاماسى بار، بىراق بارلىعىنىڭ تاقىرىبى بىردەي بولادى. بالالاردىڭ جازعى دەمالىسىن ۇيىمداستىرۋدىڭ بىرىڭعاي تاسىلدەرىن ازىرلەۋ ماقساتىندا بالالاردىڭ قۇقىقتارىن قورعاۋ كوميتەتى جازعى دەمالىستا بالالاردىڭ دەمالىسىن، بوس ۋاقىتىن جانە جۇمىسپەن قامتىلۋىن ۇيىمداستىرۋ تۇجىرىمداماسىن ازىرلەپ، وڭىرلەرگە جىبەردى. تۇجىرىمدامادا ءار ءتۇرلى اپتالىق تاقىرىپتار مەن باعىتتار بار. بالالار ءۇشىن ساۋىقتىرۋ، ءبىلىم بەرۋ، ەكولوگيالىق، شىعارماشىلىق، سپورتتىق، كوشباسشىلىق باعىتىنداعى باعدارلامالار ازىرلەندى»، – دەدى وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ توراعاسى ەسەنعازى يمانعاليەۆ.

بالالار مەن اتا-انالاردى قاجەتتى اقپاراتپەن قامتاماسىز ەتۋ ماقساتىندا بيىل bala-demalys.kz بالالار ساۋىقتىرۋ لاگەرلەرىنىڭ ينتەراكتيۆتى كارتاسى، سايت جانە ءموبيلدى قوسىمشا ىسكە قوسىلدى.

 

ۇقساس جاڭالىقتار

Back to top button