توقاەۆ بۇۇ باس حاتشىسىنىڭ ارناۋلى وكىلىمەن كەزدەستى

مەملەكەت باسشىسى قاسىم-جومارت توقاەۆ بۇۇ باس حاتشىسىنىڭ ارناۋلى وكىلى جانە اۋعانستانعا كومەك كورسەتۋ جونىندەگى بۇۇ ميسسياسىنىڭ باسشىسى دەبورا لايونستى قابىلدادى دەپ حابارلادى turkystan.kz اقوردانىڭ رەسمي سايتىنا سىلتەمە جاساپ.

كەزدەسۋدە اۋعانستانداعى داعدارىستى تۇراقتاندىرۋ، گۋمانيتارلىق كومەك كورسەتۋ جانە الەۋمەتتىك-ەكونوميكالىق جاعدايدى قالپىنا كەلتىرۋ جونىندەگى حالىقارالىق كۇش-جىگەر اياسىندا قازاقستان مەن بۇۇ اراسىنداعى ىنتىماقتاستىقتى دامىتۋدىڭ پەرسپەكتيۆالارى تالقىلاندى.

مەملەكەت باسشىسى قازاقستاننىڭ تەرروريزم مەن ەكسترەميزمگە قارسى كۇرەس، اۋعانستانعا گۋمانيتارلىق كومەك كورسەتۋ، اۋعان ستۋدەنتتەرى ءۇشىن ءبىلىم بەرۋ باعدارلامالارىن جالعاستىرۋ سالالارى بويىنشا حالىقارالىق قوعامداستىقپەن جان-جاقتى ىنتىماقتاستىقتى جالعاستىرۋعا بەيىلدى ەكەنىن راستادى.ۆ

دەبورا لايونس مەملەكەت باسشىسىنا ەۋروپالىق وداق پەن ورتالىق ازيانىڭ اۋعانستان جونىندەگى ارناۋلى وكىلدەرىنىڭ كەشە الماتىدا وتكەن ەكىنشى كەزدەسۋىنىڭ قورىتىندىسى، سونداي-اق UNAMA كەڭسەسىنىڭ اۋعانستاندى قالپىنا كەلتىرۋ ءۇشىن قابىلداعان شارالارى جونىندە مالىمەت بەردى.

بۇۇ جوعارى لاۋازىمدى وكىلى وسى ۇيىمنىڭ اۋعانستانداعى ميسسياسىنىڭ قىزمەتىنە قولداۋ كورسەتكەنى ءۇشىن قازاقستان پرەزيدەنتىنە العىس ايتتى. قول جەتكىزىلگەن كەلىسىمدەرگە سايكەس UNAMA-نىڭ ۋاقىتشا قاشىقتاعى كەڭسەسى الماتىدا ورنالاساتىن بولدى. جۋىق ارادا قازاقستانداعى اتالعان ميسسيانىڭ مارتەبەسى تۋرالى كەلىسىمگە قول قويىلادى.

ۇقساس جاڭالىقتار

Back to top button