تجم: كران قۇلاعان كوپقاباتتى ۇيگە قاتىستى تەكسەرۋ اياقتالدى

نۇر-سۇلتان قالاسىنداعى «كوركەم تاۋەر» تۇرعىن ءۇي كەشەنىندە بولعان توتەنشە وقيعانى تەكسەرۋ اياقتالدى. بۇل تۋرالى توتەنشە جاعدايلار مينيسترلىگى ونەركاسىپ قاۋىپسىزدىگى كوميتەتىنىڭ ءباسپاسوز قىزمەتى مالىمدەدى دەپ حابارلادى turkystan.kz.

«2022 جىلعى 28 ساۋىردە قۇرىلىس-مونتاجداۋ جۇمىستارى كەزىندە (باس مەردىگەر «Intex contract» جشس) QY25 ماركالى اۆتوموبيل كرانى «كوركەم تاۋەر» تۇرعىن ءۇي كەشەنىنىڭ 6-قاباتىنداعى پاتەردىڭ تەرەزەسىن سىندىرعان بولاتىن. «سترويكلاسس-مەحانيزاتسيا» جشس بارلىق مۇددەلى تاراپپەن بىرگە كوميسسيا قۇردى. كوميسسيا، وقىس وقيعانىڭ اۆتوموبيل كرانىنىڭ جۇك كوتەرگىش شەكتەگىشى مەن جەبە ۇزىندىعىنىڭ سەنسورى جۇمىس ىستەمەگەندىكتەن بولعانىن انىقتادى» ، – دەلىنگەن ءباسپاسوز قىزمەتىنىڭ حابارلاماسىندا.

كران يەسىنە ايىپپۇل سالىندى.

«سونىمەن قاتار قر توتەنشە جاعدايلار مينيسترلىگى ونەركاسىپ قاۋىپسىزدىگى كوميتەتىنىڭ نۇر-سۇلتان قالاسى بويىنشا دەپارتامەنتىنىڭ قىزمەتكەرلەرى كراننىڭ يەسىن قاۋىپسىزدىك تالاپتارىن بۇزعانى ءۇشىن قر «اكىمشىلىك قۇقىقبۇزۋشىلىق تۋرالى» كودەكسىنىڭ 298-بابى 1-بولىگى بويىنشا اكىمشىلىك جاۋاپكەرشىلىككە تارتتى»، – دەلىنگەن مالىمەتتە.

ايتا كەتسەك، 28 ساۋىردە نۇر-سۇلتانداعى تۇرعىن ءۇيدىڭ التىنشى قاباتىنا كران قۇلاعان بولاتىن.

ۇقساس جاڭالىقتار

Back to top button