50374
«8 жылдан кейін елімізде жағдай қазіргіден де қиын болады» - депутат
«8 жылдан кейін елімізде жағдай қазіргіден де қиын болады» - депутат
8 жылдан кейін елімізде су тапшылығы туындайды. Ол кезде жағдай қазіргіден де қиын болады дейді сенатор Ақылбек Күрішбаев. Бұл туралы tursystan.kz «Астана» телеарнасына сілтеме жасап хабарлады.
Оның айтуынша, Қазақстанда судың қоры туралы нақты дерек жоқ. Сондай-ақ мемлекеттік су қоймаларын жеке ұйымдар емес, «Қазгидромет» жүргізуі тиіс дейді депутат.
Бұл үшін су қорының мониторингін цифрлық форматқа ауыстыру қажет. Қазіргі заман талаптарын ескере отырып, су ресурстарын кешенді пайдалану мен қорғау схемасын жаңарту керек.
Ақылбек Күрішбаев су шаруашылығы үшін мамандар даярлау мәселесінің де құр сөз жүзінде қалып отырғанын айтты. Еліміздің су қорын жоспарлау, бақылау және ұтымды пайдалану мақсатында бірыңғай мемлекеттік саясат жүргізетін дербес су шаруашылығы ведомствосын құруды ұсынды.
«Дүниежүзілік банктің болжамы бойынша, Қазақстандағы су ресурстарының көлемі 2030 жылға қарай 90-нан 76 текше метрге дейін төмендейді. Бұл елдегі су тапшылығы 8 жылдан кейін шамамен 15 пайызды құрайтынын білдіреді. Бүгінге дейін экономикамызда су ресурстарының мұндай жетіспеушілігі болған емес. Сондықтан біз әлі де судың тапшылығын сезінбей отырмыз», - дейді сенатор.
