90-жылдары 11 әйелге балтамен шабуыл жасаған қылмыскер қайтып оралуы мүмкін

Петропавлдықтар 90-жылдары 11 әйелге балтамен шабуыл жасаған қылмыскер түрмеден мерзімінен бұрын шығуы мүмкін екенін айтып, дабыл қақты.

Бұл туралы sputnik.kz хабарлады.

Бұл туралы ақпаратты әлеуметтік желілерде зардап шеккен әйелдердің бірінің қызы жазған. Ол жақында анасы Ақмола облысы Аршалы аудандық сотынан хат алғанын хабарлады.

«Ақмола облысының Аршалы аудандық соты 28 қыркүйекке сотталушы В.Е. Кричиневскийдің шартты түрде мерзімінен бұрын босату туралы өтінішін қарау тағайындалғанын, сондай-ақ сіздің келмей қалуыңыз өтінішті қарауға кедергі келтірмейтінін түсіндіреміз», – деп жазылған хатта.

Жәбірленушінің қызы сотқа жауап жібергендерін айтып, Ақмола облысындағы түзеу мекемелерінің бірінде жазасын өтеп жатқан маньякты босатуға үзілді-кесілді қарсы екенін білдірді.

«Мұндай адамдарды қалай босатуға болады?», – дейді әйел.

1999 жылы қарақшылық, зорлау, тонау және кісі өлтіргені үшін 25 жылға бас бостандығынан айырылған Валерий Кричиневский 2024 жылы ғана жазасын толық өтейді.

 

Back to top button