ۇيىنە گاز تارتىلعان ەلوردا تۇرعىندارى ەلباسىنا العىس ايتتى

ەلباسى نۇرسۇلتان نازارباەۆتىڭ اتىنا ەلوردانىڭ جەكە سەكتورىندا تۇراتىن ازاماتتاردان ۇجىمدىق حات كەلىپ ءتۇستى. تۇرعىندار حاتتا ەلباسىنىڭ بەس الەۋمەتتىك باستاماسىن جۇزەگە اسىرۋ اياسىندا ۇيلەرىنە كوگىلدىر وتىن تارتىلعانىن جازىپ، ريزاشىلىق بىلدىرگەن.

بۇل تۋرالى ەلباسىنىڭ ءباسپاسوز قىزمەتى Instagram-داعى پاراقشاسىندا جازدى. ەسكە سالايىق، بىلتىردان بەرى ەلوردانى گازداندىرۋ جۇمىستارى جۇرگىزىلىپ جاتىر.

«مەن العاشىندا بۇعان سەنگەن جوقپىن. كەيىن اۋلاعا قۇبىر تارتىپ جاتقانىن كورگەندە تاڭ قالدىم، قاتتى قۋاندىم. بىراق، العاشقى كۇندەرى ۇيرەنە الماي، ەسكى ادەتپەن ۇيگە كومىر تاسىپ ءجۇردىم»، – دەيدى زەينەتكەر ليديا انتونيۋك.

«بۇرىن گاز باللونىن پايدالاناتىن ەدىك. ونى ۇيگە دەيىن كوتەرىپ كىرۋ ءبىز سەكىلدى ادامدارعا قيىن بولاتىن. ال، قازىر راحات، كراندى كوتەرە سالاسىڭ، گاز جانادى»، – دەيدى تاعى ءبىر استانالىق تۇرعىن زامانبەك دۇيسەنباەۆ.

ايتا كەتەيىك، نۇر-سۇلتان قالاسىن گازبەن تولىق قامتۋ 2023 جىلى اياقتالادى. بۇگىندە قالاداعى 30 مىڭ جەر ءۇي كوگىلدىر وتىنعا قوسىلىپ ۇلگەردى. 2021-2022 جىلدارى «كۇيگەنجار»، «ميچۋرينو»، «ينتەرناتسيونالنىي»، «وڭتۇستىك-شىعىس»، «اگروگورودوك» تۇرعىن الاپتارىنىڭ حالقى دا گازعا قول جەتكىزەدى.

ۇقساس جاڭالىقتار

Back to top button