Отандық блогер әкімшілік құқық бұзғаны үшін қамауға алынды (видео)

Шымкентте Руслан Жанпейісов есімімен белгілі блогер әкімшілік құқық бұзғаны үшін 25 тәулікке қамауға алынды, – деп жазды ҚазАқпарат. Шымкент қалалық Полиция департаментінен мәлім еткендей, 12 сәуір күні Шымкент қаласындағы «Капал батыр» көпірінің жанындағы блокпостта полицейлер тоқтатқан көліктердің арасында «Opel» автомашинасы болған. Карантин кезінде қалада жүріп-тұруға рұқсат құжатын тексеру барысында жүргізуші Бибарыс Райымбеков (Руслан Жанпейісов есімімен танымал блогер) «Adil Stroi Project» ЖШС-да заңгер болып жұмыс істейтіні туралы анықтама ұсынған. «Оның сөзінше, сол анықтама негізінде полицейлер оны кедергісіз өткізуі тиіс болған. Онымен бірге, анықталғандай, бұл ЖШС қазіргі уақытта қала ішінде ешқандай жұмыс атқарып жатқан жоқ. Азаматтарға, соның ішінде ішкі істер органдарына заңды сақтау қажеттігін айтып жүретін блогер тексеріс барысында құқықтық тәртіпті бұзуға әрекеттенді. Ол құжаттар тексерілгеннен кейін де полиция қызметкерлерінің жұмысына кедергі келтіруді жалғастырып, видео жазып, әлеуметтік желілерде трансляция жүргізді», – деді полицияда. Бибарыс Райымбековке қатысты ҚР Әкімшілік құқықбұзушылық туралы кодекстің №476 (Төтенше жағдай режимін бұзу) және №478 баптарына (Төтенше жағдай кезінде құқықтық тәртіпті бұзуға әкеп соғатын әрекет жасау) сәйкес әкімшілік хаттамалар толтырылды. «14 сәуір күні видеоконференция түрінде өткен сот процесінде ТЖ режимін бұзушыға 10 тәулікке әкімшілік қамауға алу тағайындалды. Сондай-ақ сот анықтағандай, азамат Райымбеков төтенше жағдайдың енгізілуіне байланысты құқыққорғау органдары қызметкерлерінің тарапына өзінің наразылығын білдіріп, іс-әрекетімен құқықтық тәртіпті бұзуға әрекеттенді. Тікелей эфирдегі трансляцияда өзінің негативті пікірін білдіре отырып, төтенше жағдай режимі жарияланған елдімекенде қызметтік міндеттерін атқарып жатқан лауазымдық тұлғаларға қарсылық білдірді. Осыған орай, оған 25 тәулікке әкімшілік қамауға алу тағайындалды», – деді департаменттен.

Серіктес жаңалықтары