Қытай ең үлкен зымыранын ұшырды

Қытайдың Вэньчан ғарыштық ұшу орталығы “Чанчжэн-5” зымыран тасығышын (Ұлы сапар 5) ұшырды. Зымыранды келесі жолы Қытайдың Ай-Марс бағдарламасында қолдану жоспарланған.
Зымыран жергілікті уақыт бойынша сағат 20: 46-да “Чяньцзинь-20” жер серігімен ұшырылды. Ол геостационарлық орбитада жұмыс істейді. Жергілікті сарапшылардың пікірінше, бұл ғарыш кемесі алдағы 5-15 жыл ішінде телекоммуникация саласының қажеттіліктерін толығымен қамтамасыз етеді, деп жазады Massaget.kz.
“Чанчжэн-5” – Қытайдағы зымырандар жаңа буынының ең қуатты зымыран тасығышы саналады. Оның биіктігі – 57 метр, диаметрі – 5 метр, бастапқы салмағы – 870 тонна. Зымыран Жер орбитасына 25 тонна, ал геостационарлық орбитаға 14 тонна жүк тасымалдай алады. Оған отын ретінде сұйық оттегі мен сұйық сутегі қолданылады.
Зымыран Қытайдың ғарышты қашықтықтан зерттеуінде және басқарылатын ұшу бағдарламасында маңызды рөл атқарады. Ол алғаш рет 2016 жылдың қараша айында “Шицзянь-17” жер серігі арқылы ұшырылды. Екінші рет “Шицзянь-18” жер серігі үшін 2017 жылдың шілдесінде қолданылған, бірақ сәтсіздікке байланысты орбитаға шыға алмады. Қазіргі рейс “Чанчжэн” зымырандарының 323-ші миссиясы болды. 2020 жылға қарай “Чяньцзинь”-5-ті ҚХР ғарыштық бағдарламасының үш маңызды миссиясында пайдалану жоспарланған.

Back to top button