قازاقستاندا 13 ملن تەڭگە جالاقىنى كىمدەر الادى

قازاقستاندا 2018 جىلدىڭ ءتورتىنشى توقسانىندا ءبىر قىزمەتكەردىڭ ورتاشا ايلىق اتاۋلى جالاقىسى 176 050 تەڭگەنى قۇرادى. بۇل جايىندا قر ۇلتتىق ەكونوميكا مينيسترلىگى ستاتيستيكا كوميتەتىنەن ءمالىم ەتتى، دەپ حابارلايدى قازاقپارات.

سالالىق قۇرىلىمدا ەڭ ۇلكەن اتاۋلى جالاقى كەن ءوندىرۋ ونەركاسىبى جانە كارەرلەردى قازۋ سالاسىندا – 390،4 مىڭ تەڭگە (ورتاشا رەسپۋبليكالىق دەڭگەيدەن 2،2 ەسەگە كوپ)، قارجى جانە ساقتاندىرۋ قىزمەتىندە – 364،7 مىڭ تەڭگە (2،1)، كاسىبي، عىلىمي جانە تەحنيكالىق قىزمەتتە – 332،5 مىڭ تەڭگە (1،9)، اقپارات جانە بايلانىس سالاسىندا – 261،7 مىڭ تەڭگە (1،5)، قۇرىلىس سالاسىندا – 227،5 مىڭ تەڭگە (1،3) كولەمىندە بەلگىلەندى.

ەڭ تومەنگى اتاۋلى جالاقى ءبىلىم بەرۋ قىزمەتكەرلەرىندە – 107،9 مىڭ تەڭگە بولدى. بۇل رەسپۋبليكا بويىنشا ورتا كورسەتكىشتەن 38،7 پايىزعا تومەن.

وڭىرلىك بولىنىستە ەڭ جوعارى جالاقى اتىراۋ وبلىسىندا – 320،5 مىڭ تەڭگە. بۇل ورتاشا رەسپۋبليكالىق كورسەتكىشتەن شامامەن 1،8 ەسەگە جوعارى. تۇركىستان وبلىسىندا جالاقى 109،7 مىڭ تەڭگە بولدى. بۇل ەل بويىنشا ورتاشا دەڭگەيدەن 37،7 پايىزعا تومەن.

مەدياندىق ماندەگى قىزمەتكەرلەردىڭ ورتاشا ايلىق جالاقىسى بىرجولعا زەرتتەۋ قورىتىندىلارى بويىنشا 106 253 تەڭگەنى، مودالدىك ماندەگى قىزمەتكەرلەردىڭ ورتاشا ايلىق جالاقىسى 80 021 تەڭگەنى قۇرادى.

ستاتيستيكا كوميتەتىنىڭ مالىمەتىنە سايكەس، قازاقستانداعى ەڭ جوعارى جالاقى – 13192،4 مىڭ تەڭگە. مۇنداي جالاقىنى كەن ءوندىرۋ ونەركاسىبى، كارەرلەردى قازۋ، قارجى جانە ساقتاندىرۋ قىزمەتى مەن وزگە دە وڭدەۋ ونەركاسىبى تۇرلەرى سالالارىنداعى باس ديرەكتور الادى. ەڭ تومەنگى جالاقى مولشەرى – 15،6 مىڭ تەڭگە. بۇل سوماداعى ايلىقتى ءبىلىم بەرۋ جانە مەملەكەتتىك باسقارۋ سالالارىندا جيناپ-تازالاۋشى قىزمەتكەرلەر الادى.

ۇقساس جاڭالىقتار

Back to top button