ەلەكتروندى قىزمەتتىڭ  ەرەن جەتىستىكتەرى

مەملەكەت باسشىسى 2017 جىلعى 31 قاڭتارداعى قازاقستان حالقىنا جولداۋىندا تسيفرلاندىرۋ ارقاۋى بولىپ تابىلاتىن ءۇشىنشى جاڭعىرۋ تۋرالى، تسيفرلىق تەحنولوگيانى قولدانۋ ارقىلى قۇرىلاتىن جاڭا يندۋستريالاردى وركەندەتۋ قاجەتتىلىگىن، جانە «كوممۋنيكاتسيانىڭ دامۋى مەن وپتيكالىق-تالشىقتى ينفراقۇرىلىمعا جاپپاي قولجەتىمدىلىكتى قامتاماسىز ەتۋ كەرەك. تسيفرلىق يندۋستريانى دامىتۋ باسقا بارلىق سالالارعا سەرپىن بەرەدى» دەپ جاريالاعان بولاتىن. وسى باعدارلامامەن مەملەكەتتىك ورگانداردىڭ قىزمەتتەرىن تسيفرلاندىرۋ بويىنشا العا ءورشىل ماقساتتار قويىلدى. ماقساتتاردى ىسكە اسىرۋ ءۇشىن بەيىمدەلگەن زاڭناما، كاسىپتى، ءبىلىم مەن عىلىمدى قولداۋ شارالارى، كاسىپتى جۇرگىزۋ راسىمدەرىن جەڭىلدەتۋ، مەملەكەتپەن ءوزارا ارەكەتتەسۋ كەزىندەگى شىعىنداردى قىسقارتۋ بويىنشا بىرقاتار شارالار جۇزەگە استى. سونىڭ ەڭ باستى ءارى ءىرى جوبالارىنىڭ ءبىرى – ەلەكتروندىق ۇكىمەت. ونىڭ قۇرىلعانىنا 14 جىلدان استى. العاش 2004 جىلى قر پرەزيدەنتى ن.نازارباەۆتىڭ باستاماسىمەن قولعا الىنعان جوبا جىل سايىن دامىپ كەلەدى. 2017 جىلى ەلەكتروندىق ۇكىمەتتىڭ ينفراقۇرىلىمى ارقىلى 34 ميلليوننان استام قىزمەت كورسەتىلگەن. ال پورتال ىسكە قوسىلعاننان بەرى كورسەتىلگەن قىزمەتتەردىڭ جالپى سانى 200 ميلليوننان استى.

ەلەكتروندىق ۇكىمەتتە 2017 جىلى سۇرانىسى جوعارى بولعان قىزمەتتەر قاتارىندا  مەكەنجاي انىقتاماسى  22،4 ملن رەت; جىلجىمايتىن مۇلiكتiڭ بولماۋى (بولۋى) تۋرالى 5،2 ملن; جىلجىمايتىن م ۇلىكتىڭ تەحنيكالىق سيپاتتامالارى تۋرالى 5،5 ملن; بالانى بالاباقشا كەزەگىنە قويۋعا 92،9 مىڭ; نەكەنى تىركەۋگە  79،3 مىڭ; بالا تۋىلۋىن تىركەۋگە 18،4 مىڭ ءوتىنىش بەرىلگەن.

سونىمەن قاتار، قازاقستاندىقتار eGov.kz  پورتالىندا ونلاين تۇردە سالىقتار مەن ايىپپۇلدار جانە ت.ب. ونلاين تولەم جاساۋدىڭ جەڭىلدىگىن باعالاۋدا. 2017 جىلى ەلەكتروندىق ۇكىمەتتىڭ تولەم ءشليۋزى ارقىلى 17 ميلليارد تەڭگەدەن استام سوماعا تولەمدەر جاسالعان.

سونداي-اق، سوڭعى 3 جىلدا ازاماتتار جاساعان ترانزاكتسيالار دا ەكى ەسەگە ارتقان.  2014 جىلى 639،7 مىڭ ترانزاكتسيا، ال 2017 جىلى 1،9 ملن ترانزاكتسيا جاسالدى.  ال تولەمدەردىڭ جالپى سوماسى سەرۆيس ىسكە قوسىلعان ساتتەن بەرى 46 ميلليارد تەڭگەدەن استى. ەلەكتروندىق-تسيفرلىق قولتاڭبانىڭ بەرىلۋى دە جىل سايىن ارتىپ كەلەدى. 2017 جىلى ەلىمىزدە ەتسق 6،4 ملن رەت بەرىلىپ،  1،5 ملن-نان استام ادام تسيفرلىق قولتاڭبانى جەكە كۋالىكتەرىنە تىركەگەن.

ەلەكتروندى ۇكىمەت پورتالى قىزمەت كورسەتە باستاعاننان بەرى كوپتەگەن مەملەكەتتىك قىزمەتتەر اشىقتىق جۇيەسىنە كوشتى. ورىن العان جەمقورلىق، تامىر-تانىستىق ارقىلى قىزمەت كورسەتۋ قىسقارتىلدى. جالپى، ءار سالانى تسيفرلاندىرۋ – ەل دامۋىنىڭ، ساياسات اشىقتىعىنىڭ كورسەتكىشى. ۋاقىتتى ءتيىمدى پايدالانۋدىڭ ەڭ باستى قۇرالى رەتىندە دە وسى ەلەكتروندى جانە ونلاين كورسەتىلەتىن قىزمەت تۇرلەرىن ايتا الامىز. بۇل – از جىلداعى مەملەكەت جەتكەن ۇلكەن جەتىستىك.

مەملەكەتتىك قىزمەتتەر حالىق تۇتىناتىن باستى قىزمەت بولعاندىقتان، ونىڭ حالىققا قولجەتىمدى، تەز ءارى جىلدام  اتقارىلۋى باستى مىندەتتەردىڭ ءبىرى. ال ونىڭ تۇگەلدەي تسيفرلانۋى مەملەكەت پەن حالىقتىڭ ءبىر-بىرىنە دەگەن سەنىمىن ارتتىراتىنى ءسوزسىز. «تسيفرلى قازاقستان» باعدارلاماسى نەگىزىندە ىسكە اسىپ جاتقان ەلەكتروندى ۇكىمەتتىڭ دە كوزدەيتىنى وسى.

ۇقساس جاڭالىقتار

Back to top button