بەلارۋسيادان جۇلدەلى قايتقان ەر ەرنار

«سلاۆيان بازارى» حالىقارالىق ونەر فەستيۆالىندە 1 ورىن العان ەرنار سادىرباەۆ استانادا ءباسپاسوز ءماليحاتىن وتكىزدى.

ءانشىنىڭ پروديۋسەرى جان مۇقانوۆ امىرەنىڭ جاقىندا رەسەيلىك تەلەارنانىڭ جاڭا شوۋىنا قاتىسۋى مۇمكىن دەپ حابارلادى.

«بىزگە رەسەيلىك تەلەارنالاردان ۇسىنىستار ءتۇسىپ جاتىر. اتاپ ايتقاندا، «روسسيا» تەلەارناسىندا جاڭا شوۋ اشىلادى. ۇيىمداستىرۋشىلار ەرناردى ساراپشى بولۋعا شاقىردى. بىراق ساراپشى بولۋدىڭ قىزىق ەمەس ەكەنىن كەسىپ ايتتىم. 23 جاستاعى بالادان قانداي ساراپشى شىعادى؟ ودان دا شوۋدىڭ وزىنە قاتىستىرايىق دەپ ۇسىنىس ءبىلدىردىم»، – دەدى پروديۋسەر جان مۇقانوۆ.

سونداي-اق، پروديۋسەر ءانشىنىڭ بولاشاقتاعى وبرازى جونىندە باياندادى.

«الداعى ۋاقىتتا ەرناردىڭ قازاقستاندىق ارتىستەرگە ۇقسامايتىن ەرەكشە جاڭا ءستيلىن قالىپتاستىرامىز. تورەعالي سەكىلدى توي ءانشىسىن جاسامايمىن فورماتى دا، وبرازى دا مۇلدەم باسقا بولادى. بۇگىن تاڭەرتەڭ قوڭىراۋ ءتۇسىپ، ەرناردى ۇيلەنۋ تويىندا ونەر كورسەتۋگە شاقىردى. بىردەن باس تارتتىق. قازىر بۇل ماڭىزدى ەمەس. شىنىندا دا، قازاقستاندىق ارتىستەر تويلاردا عانا جاقسى تابىس تابادى. ال ءبىز كونتسەرتتەن قاراجات تابۋعا تىرىسامىز»، – دەپ ءوز ءسوزىن تۇيىندەدى پروديۋسەر.

ايتا كەتسەك، «امىرە» (ەرنار سادىرباەۆ) بەلارۋستە وتكەن «سلاۆيان بازارى» حالىقارالىق ونەر فەستيۆالىندە جۇلدەلى 1 ورىندى جەڭىپ العان ەدى. 2015 جىلى بۇل بايقاۋدا قازاقستاندىق ديماش قۇدايبەرگەن باس جۇلدەنى يەلەنگەن بولاتىن.

ۇقساس جاڭالىقتار

Back to top button