ҚАМАЛ БҰЗҒАН ҚҰРЫШТАР... (видео, фото)

30 қазан, 2014

Автор

289

«Отар» әскери базасында ҚР Қорғаныс министрлігі құрлық әскерлерінің жылдық қорытынды әскери оқу-жаттығуы өтті. Жауынгерлердің ептілігі мен ерлігін шыңдайтын «Экспрес-тест» сынағына 728 әскери қызметкер қатысты.

Бұл сынақ – Құрлықтағы әскерлердің бас қолбасшысы генерал-лейтенант Мұрат Майкеевтің бастамасымен төрт жыл бұрын тактикалық жоспарға енген болатын. «Экспресс-тест» – құрлық әскерлерінің соғыс өнерін шыңдайтын қатал тапсырмалардың бірі. Бұл арқылы біз барлық құрлық әскерінің дайындығын, қабілетін бір полигонда көре аламыз. Олардың бағасын командирлер емес, құрлық әскерінің қолбасшысы береді», – дейді Жауынгерлік дайындықты бақылау басқармасының бастығы, генерал-майор Сәбит Құдайбергенов.

Соғыс жағдайына ұқсатылып жасақталған сайыстарға 11 танк командасы, 8 артиллерия, 15 инженерлік, 6 байланыс командасы және Аэроұтқыр әскерлерінің шабуылдаушы десанттары, мотоатқыштар, теңіз жаяу әскерлерінен құралған 11 команда қатысып, атыс қимылын көрсетті. Бұлардан бөлек, экспресс-тестке мина қою және минадан тазартушы 7 бөлімше қатысып, Құрлық әскерлерінің Инженерлік құрамындағы бөгеттерді бұзуға, кедергілерді алып тастауға, окоп қазуға арналған ауыр техникалары да соғыс жағдайындағы қорғаныс пен шабуылға өтуге бағытталған іс-қимылдарын шыңдады.

Сарбаздардың жеке дайындығы мен қаруларын қолдануы, командамен түрлі кедергілерден өтуі, кір тасын көтеру, 5 және 10 шақырымға жүгіру сынды физикалық, ақыл-ой зеректігін сынға алатын сайыстарда сыналды. «Бұл сынақта аэроұтқыр әскерлері сөреде тұрып қаруды жинақтап, алаңнан жүгіріп өтіп, 16 келі салмақтағы жәшікті 20 рет көтеріп, одан әрі жарақаттанған адамды 20 метрге сүйреп, көтеріп өткізіп, темір сымдардың астынан жер бауырлап өтіп, мәреге жетуіміз керек. Негізінде 4 минут уақыт беріледі, біз бұдан 3 минут 20 секундта өтіп үлгердік», – дейді экспресс-тестке қатысушы, 32363 әскери бөлімінің гвардия сержанты Жақсылық Қамзаев.

Ал «Мәтібұлақ» полигонында өткен сайыста ауыр техникаларды басқаратын жауынгерлер жаяу әскердің ұрыс машинасымен қозғалыста қашықтықтан танкіге қарсы оқ ату, әуе шабуылына тойтарыс беру, зеңбіректерді жедел құрып, 25 шақырымдағы нысананы жою сынды оқу-жаттығуларын көрсетіп сынға түсті. Жаттығудағы ең тартысты сайыс Алматы, Ақтау, Жаркент, Талдықорған, Тараз, Үшарал, Сарыөзектен келген зеңбірекшілер арасында өтті.

«Экспресс-тестің» басты талабы – сайысқа шақырылатын бөлімшелер алдын ала тартылған жеребе бойынша оқу-жаттығуға шұғыл түрде шақырылады.

Сайыстағы ережесі бойынша әрбір жаттығу қимылына балл қойылып, жаттығу аяқталғанда сол бойынша жеңімпазды Құрлықтағы әскерлердің бас қолбасшысы анықтайды.

Жәнібек ҒАЛЫМ,

Суреттерді түсірген

Мақсат ҚҰСАЙЫНОВ

Алматы-Отар-

Мәтібұлақ-Алматы

ҚАМАЛ БҰЗҒАН ҚҰРЫШТАР... (видео, фото)

ҚАМАЛ БҰЗҒАН ҚҰРЫШТАР... (видео, фото)

Серіктес жаңалықтары