Азаматтарды бірыңғай қабылдау күні

15 наурызда Қазақстан Республикасының 2010-2014 жылдарға арналған үдемелі индустриалдық-инновациялық даму мемлекеттік бағдарламасы аясында арнайы жобаларды жүзеге асырып жатқан нысандарда «Азаматтарды бірыңғай қабылдау күні» акциясы өтті.

Акция барысында партия төрағасының бірінші орынбасары үдемелі индус­триалды-инновациялық даму бағдар­ламасы аясында іске қосылған кәсіп­орындардың жұмысымен танысып, еңбек ұжымдарымен кездесті. «Нұр Отан» партиясы Саяси кеңесі Бюросының отырысындағы тапсырмасын орындау үшін партияның Орталық аппараты жанындағы Қоғамдық қабылдау бөл­месі рес­публика көлемінде бірыңғай қабылдау күнін өткізді. Осы мақсатта партия республика көлемінде 87 нысанға барып, еңбек ұжым­дарымен кездесті. Қазір Индустрияландыру картасы аясында ашылған өндіріс ошақта­рында 10 мыңнан астам адам жұмыс істейді. Сондықтан би­лік партиясы еңбек ұжымда­рымен ой бөлісіп, олардың мәселесін тыңдады.

Партияның Орталық аппараты және Астана қалалық филиалының өкілдері «Электровоз құрастыру зауыты» ЖШС-нің еңбек ұжымына барып, жұмыс қарқынымен танысты. «Бұл зауытта заманауи жолаушылар және жүк вагондары шығарылады. Телефон байланысы, балабақшаға орналастыру, тамақтандыру, медициналық көмек қолжетімділігі тәрізді мәселелер былтыр айтылған еді. Олар шешілді. Бүгін тағы да келіп, зауыт жұмыскерлерін алаңдататын түйткілдерді тыңдап отырмыз. Бұл жолы қарапайым еңбек адамдары оқу мәселесін көтерді. Өндіріс оша­ғын­да «Болашақ» бағдарламасымен оқыған он маман жұмыс істейді. Өзгелердің де оқуға деген ниеттері жоғары. Бүгін осы жағы кеңінен сөз болды. Мұнымен қатар баспана мәселесі көтерілді. Келешекте осында банктің өкілдерін әкеліп, олардың қызметін көпшілікке таныстырамыз», – деді «Нұр Отан» ХДП Орталық аппараты жанындағы Қоғамдық қабылдау бөлімінің жетекшісі Жұмажан Жүкенов. Бұл шара аясында партияның өңірлердегі филиалдары да өндіріс ошақтарында болып, қарапайым еңбек адамының тұрмыс-тіршілігіне көңіл бөлді. Партия бел­сенділері Қоғамық қабылдау кезінде айтылған өтініш-тілек­тердің орындалып, жұмыс жағдайын жақсартуға қатысты мәселелерді шешуге уәде берді.