ДИНАМОЛЫҚТАР ДҮБІРЛІ ДОДАҒА ДАЙЫН

Санаулы күндерден кейiн Лондонда жалауы көтерiлетiн ХХХ Олимпиадалық ойындарға күллi әлем жұртшылығының назары ауатыны белгiлi. Қазiргi күнi оған қатысу жолдамасы сарапқа салынып бiттi және онда өнер көрсететiн спортшылардың да есiмдерi белгiлi болды. Төрт жылда бiр рет әлемнiң ең мықты спортшыларының басын қосатын бұл дүбiрлi додаға елiмiзден 115 спортшы аттанғалы отыр және олардың 63-i динамолықтар.

Жалпы, динамолық спортшылар алға қойған мақсатты орындап, алпыстан аса жолдаманы ұтып алды және спорттың 15 түрінен сынға түсетін болады. 2008 жылы Бейжіңде өткен ХХІХ Олимпиада ойындарына да 63 динамолық қатысып, нәтижесінде 11 спортшы жеңіспен орал­ған еді.

«Динамо» дене шынықтыру спорт қо­ғамының спорт басқармасы бөлімінің бас­шысы Николай Князев биылғы спорт­шы­лардың әлеуеті өзге жарыстарға қа­ты­су­шыларға қарағанда анағұрлым жоғары екен­дігін айтады.

« – Бұл спорт ойындары болғандықтан оған алдын ала болжам жасап, анау алтын алады, мынау күміс алқа иеленеді деп айту қиын. Спорттық ойындар әр­қа­шанда тартысты өтетіндіктен түрлі жағ­дайлар орын алуы мүмкін. Яғни спортшы­лар аяқ астынан жарақат алып қалу қаупі де бар. Сондықтан кімнің оза шабатындығын спорт алаңы көрсетеді», – дейді Н. Князев.

Сондай-ақ биылғы Олимпиадалық ойын­дардың ашылу рәсімінде еліміздің бай­рағын көтеріп шығатын Нұрмахан Тінәлиевтің динамолық спортшы екен­дігін мақтанышпен айта аламыз. Сонымен қатар Лондонда еліміздің намысын қор­ғайтын Алмат Кебісбаев, Дархан Баяхметов, Гузель Манюрова, Жұлдыз Ешімова – Туртбаева (күрестен), Илья Ильин, Зульфия Чиншанло, Майя Манеза, Светлана Подобедова (ауыр атлетика), Иван Дычко, Әділбек Ниязымбетов, Данияр Елеусінов, Марина Вольнова (бокс), Максим Раков, Сергей Лим, Ислам Бозбаев (дзюдо) сынды саңлақтарымыз динамолық спортшылар.

Динамолық спортшылар ешбір сай­ыстан құралақан қайтып жүрген жоқ, керісінше ел мерейін асқақтатып, биік тұғырлардан көріне білуде. Олай бол­са, спортшыларымыз осы жолғы Олим­пиадалық ойындарда да жақсы өнер көр­сетіп, үлкен жетістікке қол жеткізеді деген үміттеміз.