ТАРИХ ФАКУЛЬТЕТІНДЕГІ КЕЗДЕСУ
ТАРИХ ФАКУЛЬТЕТІНДЕГІ КЕЗДЕСУ
Жуырда Әл-Фараби атындағы Қазақ ұлттық университеті тарих факультетіндегі «АЭМ» кафедрасы тарих ғылымдарының докторы Досбол Байғонақовтың ұйымдастыруымен мемлекет және қоғам қайраткері Дінмұхамед Меңліахметұлы Қонаевтың туғанына 100 жылдығына байланысты қонаевтанушылар: ғалым-жазушы Мамытбек Қалдыбай, журналист Көлбай Адырбекұлы және Ораз Қауғабайдың 3-курс студенттерімен кездесуі болды.
Бірнеше кітаптардың авторы Мамытбек Қалдыбай ірі тұлғаның ата тегіне байланысты деректі әрі қызықты әңгімелер айтты. Студенттерге Қонаевтың өмір жолынан жазған «Жүз жыл аңсаған» атты деректі романын тарту етті.
«Түркістан» газетінің қызметкері Көлбай Адырбекұлы студенттерге Қонаевтың қызметтен босаған кезіндегі Колбиннің қысымшылығына ұшыраған ауыр кезеңі, КСРО Бас прокуратурасы тергеушілерінің іс-әрекеттері туралы сыр шертті.
«Ақиқат» журналының қызметкері Ораз Қауғабай мемлекеттік тұлғаның республика басшылығында жүрген кездегі шетел сапарлары, ел ішіндегі атқарған жұмыстары жөнінде әңгімеледі.
Олар соңынан студенттер сұрақтарына жауап берді.
