САЙЛАУ КҮНДЕЛІГІ

2011 жыл аяқталып, 2012 жылды қарсы алу қарбаласы кезінде де, алдағы саяси науқанды естерінен бір сәт шығармаған саяси партиялар мейрам күндерінде де, сайлауалды кампаниясын жалғастырды. Астанада сайлаушыларымен кездескен нұротандықтар бұл күндердегі науқандық шараларын «Есіктен есікке» деп атады.

«НҰР ОТАН» САЙЛАУШЫЛАРДЫ ПАРТИЯ

ТҰҒЫРНАМАСЫМЕН ТАНЫСТЫРДЫ

Партия тұғырнамасын таныстыру мақсатында Қазақстан көлемінде үш мыңға жуық жедел топтары аттандырылған. Олар әрбір сайлаушымен кездесіп, барлық ірі сауда орталықтарында, базарларда, қалалар мен ауылдарда партияның үгіт насихат бекеттері жұмыс атқаруда. «Нұр Отан» халықтық-демо­кра­тиялық партиясының тізімі бой­ынша Парламент Мәжілісінің депу­тат­ты­ғынан үміткерлердің бірі – Орал Мұхамеджанов Қос­та­най облысының Науры­зым, Амангелді, Жангелді сияқты шалғай аудан­дарында сайлаушы­лармен кездесті. Үміткер бұл жүзде­су­лер­де партияның «Қазақстан. 2017 жыл мақсаттары. Ұлттық іс-қимыл жоспары» атты тұғырнамасымен та­ныс­тырды. Аймақтардың тұрғындары Қазақ­стан Тәуелсіздігінің 20 жылдығында жеткен жетістіктердегі Елбасының ерен еңбегін атап, өздерінің партия­ны қолдайтындықтарын білдірді.

«АҚ ЖОЛ» ПАРТИЯСЫ ҚАЗАҚ ҰЛТШЫЛДАРЫНЫҢ

АМАНАТЫН ҚАБЫЛ АЛДЫ

«Ақ жол» партиясы ұлттық патриоттық қозғалыс лидерлерiмен кездесу өткiздi. Олар ақжолдықтарға сайлаушылардың ұлттық мүдделерiн жүзеге асыру мақсатында аманат жүктедi. «Аманаттың» басты көздегенi – ұлттық табиғи байлықтарды Қазақстан халқының мүддесi тұрғысынан пайдалану, өзге этностардың мәдениетi мен тiлiн қолдай отырып, мемлекеттiк тiлдiң рөлiн арттыру, отандық тауар өндiрушiлердi қолдау, т.б. да мәселелер. «Ақжолдықтар» ұлт патриоттарының аманаты ескерiлетiндiгiн айтады.

– Партия мемлекеттiң тұтастығына, халықтың бiрлiгiне үндейдi және ел игiлiгi үшiн жұмыс iстейтiн болады. ХХ ғасырдың басында «Алаш Орда» қайраткерлерi бiрiншi орынға ұлттық бiрлiк, экономикалық даму, либералдық-демократиялық құндылықтарды қойған едi. Осы құндылықтарды бiздiң партия ХХI ғасырдағы өз Парламенттiк қызметiнде жүзеге асыруды көздейдi, – дедi партия лидерi Азат Перуашев кездесу кезiнде.

ПАТРИОТТАР АЛМАТЫДА СЕНБIЛIК ӨТКIЗДI

Алматыдағы аула сыпырушыларға көмектесудi мақсат тұтқан Патриоттар партиясының үмiткерлерi жаңа жылдың алғашқы сенбiсiнде сенбiлiк ұйымдастырды. Партия үмiткерлерiнiң бiр тобы аулаларды сыпыруға кiрiссе, екiншi тобы халыққа үгiт насихат плакаттарын таратты. Осылай патриоттықтар партияның басты тұғырнамасының не екенiн айқындап бердi. Ол экологиялық проблемаларды шешу және қоршаған ортаны сауықтыру.

Патриоттар сонымен қатар, қоғамдық пiкiр жайындағы сауалнамалар мен болжамдардың нәтижесiн сайлау өткiзуге бес күн қалғанда жариялауға тыйым салу жөнiнде мәлiмдеме жасады. Патриоттар партиясы атынан Мәжiлiс депутаттығына үмiткер Станислав Смирнов:

– Барлық саяси партиялар мен қоғамдық бiрлестiктердi осы мәселеде белсендiлiк танытып, бiздiң ұсынысымызды қолдауға шақырамыз, – дедi.

«АУЫЛ» АУЫЛДЫ ГҮЛДЕНДIРУГЕ УӘДЕ БЕРДI

«Ауыл» партиясының өкiлдерi жаңа жыл қарсаңында Алматы облысы, Кербұлақ ауданының орталығында және ауданның Тастыөзек кентiнде сайлаушылармен кездесу өткiздi. «Ауыл» партиясы атынан Парламент Мәжiлiсi депутаттығынан үмiткер Сәрсенғали Әжiбаев ауыл тұрғындарын партия тұғырнамасымен таныс­тырып, ауыл мүддесiн қорғайтындықтарын мәлiм еттi. Осындай кездесу Астана қала­сындағы «Астана-Бурабай» өнер­кә­сiп­тiк базасында да болып өттi. Мұн­да жиналған қауым Парламент Мәжi­лiсi депутаттығынан «Ауыл» партия­сының атынан үмiткер болып тiркелген ауыл шаруа­шы­лығы ғылымдарының докторы, академик Көпмағамбет Елемесовпен кез­дестi. Дәл осындай кездесулер Ақтөбе облысының бiрқатар елдi мекендерiнде, Солтүстiк Қазақстан облы­сы­ның Қызылжар ауданында, Оңтүстiк Қазақстан облысының Кентау қаласында және елiмiздiң басқа да өңiрлерiнде болып өттi.

«ӘДIЛЕТ» КӨШПЕЛI КОНФЕРЕНЦИЯ ҰЙЫМДАСТЫРДЫ

«Әдiлет» партиясы Орал қаласындағы өндiрушi және өңдеушi кәсiпорындарда әрi азық-түлiк сата­тын нысандарда көшпелi конференциялар ұйымдастырды.Ақжайыққа «Әдiлет» партиясы төрағасының орынбасарлары Уәлихан Қайсаров пен Мәди Арты­ғалиев келдi. Кездесуге сонымен қатар партияның облыстық филиалының жетекшiсi Мұ­хит Бисенғалиев пен оның орын­басары Нұрлан Тәшiмов қатысты.

Көшпелi конференция облыстағы бiрқатар нысандар мен ұжымдарда өткiзiлдi. Орал газ-тур­би­налы электр стансасында инженер-техник қызметкерлермен кездескен әдiлет­тiк­тер Орал қаласындағы «Ел ырысы» коммуналдық базарын да аралап қайтты.

ЖСДП-ҒА ДАУЫС БЕРУДIҢ ТӨРТ СЕБЕБI

Жалпыұлттық социал-демократиялық партия лидерлерiнiң бiрi (ЖСДП) Әмiржан Қосанов сайлауалды кампания аясында Алматыда «Рух пен тiл» жастар клубына келiп, сайлаушылармен жүздестi. Әмiржан Қосанов кездесуде ЖСДП-ға дауыс берудiң төрт себебiн түсiндiрiп өттi. Бiрiншi кезекте экономикалық проблемаларға қатысты.

– Экономика – бiздiң игiлiгiмiздiң негiзi. Сол себептен бiз әрбiр тұрғынның, ұлттық қордың және мемлекеттiк бюджеттiң кiрiсiн молайтатын нақты механизмдердi ұсынып отырмыз, – дедi Әмiржан Қосанов.

ЖСДП-ның сайлауалды бағдарламасы «Өзгеретiн кез жеттi!» деп аталады. Онда байларға салынатын салықты молайту арқылы кедейлердiң кiрiсiне салынатын салықты азайтуға мүмкiндiк тудыруға болады, ал мемлекетке стратегиялық кен орындары мен кәсiпорындарын қайтару шикiзат экспортына бақылауды күшейту – мемлекеттiк әлеуметтiк саясаттың тиiмдiлiгiн көтередi делiнген.

Келесi себеп – әлеуметтiк саясатқа тiрелсе, үшiншiсi – саясат. Саяси партиялардың iшiнен тек ЖСДП ғана саяси жүйенi реформалау қажеттiгiн алға тартуда дейдi Әмiржан Қосанов.

ХАЛЫҚТЫҚ КОММУНИСТЕР

ЖАС СПОРТШЫЛАРДЫ ҚОЛДАДЫ

Астана қаласында Қа­зақ­стан Коммунистiк халықтық пар­тиясының қолдауымен 5 және 15 жас арасындағы балалар арасында ка­ратэ-до-дан чемпионат өткiзiлдi. Бұл жарыс «Алтын айдаһар» каратэ-до шотокан федерациясының басшы­лы­ғымен өттi.

Жас каратэшiлер алдында ҚКХП хатшысы Жамбыл Ахметбеков құт­тық­тау сөз сөйледi.

Жамбыл Ахметбеков жастайынан осы спорт түрiмен айналысып келедi. Талай бәйгелерде жеңiс тұғырына көтерiлген ол каратэнiң жастарды тәрбиелеудегi рөлiне айрықша тоқталды.

ҚКХП-ның сайлауалды үгiт-на­сихат жұмысымен сәйкес Парламент Мәжiлiсiнiң депу­тат­тығынан екi үмiткер Атырау об­лы­сын аралады. Бұл өңiрде Коммунистiк халықтық партияның белсендiлерi жер-жерлерде үгiт-насихат жұ­мыстарын жүргiздi. Атап айтқанда, олар Атырау қаласындағы меди­ци­на­лық колледжде жүздесу өткiзiп, пар­тия­ның сайлауалды тұғырнамасымен таныстырды. Қаладағы базарлардың бiрiнде Коммунистiк халықтық партия белсендiлерiмен кездескен сай­лау­шылар шағын және орта бизнеске қатысты өздерiн толғандырған сау­ал­дарға жауап алды.

Серіктес жаңалықтары