Бейбіт Құсанбектің бәйгесі

Журналистердiң төл мерекесi қарсаңында белгiлi тележурналист, ақын Бейбiт Құсанбек атындағы тележурналистердiң III республикалық байқауының жеңiмпаздарын марапаттау рәсiмi өттi. Марапаттау рәсiмi "Хабар" телеарнасының ғимаратында болды.

Марапаттау рәсiмiне марқұмның ата-анасы, туғандары мен замандас достары, әрiптестерi, БАҚ өкiлдерi қатысты. "Құрдастар", "Көкпар", "Дидар", "Халық зердесi", "Кездесу", "Үкiмет адамы", "Төрт құбыла", "Бейсенбiде бiзбен бiрге болыңыз", "Өмiр — өзен" "Ақиқат ауылы" сынды бағдарламаларды дүниеге әкелген Бейбiт Құсанбектiң тележурналистика саласындағы ерен еңбегiн, жарқын дидарын есте қалдыру мақсатында үшiншi жыл қатарынан ұйымдастырылып келе жатқан байқаудың жас журналистердiң қарым-қабiлетi мен шеберлiгiн арттыруда маңызы зор. Жыл сайын дәстүрге айналып келе жатқан байқаудың биылғы жеңiмпаздары анықталды. Марапаттау сыйлықтарын көрнектi ғалым Тұрсынбек Кәкiшев, белгiлi тележурналист Нұртiлеу Иманғали, журналист-ғалымдар Сағатбек Медеубек, Аязби Ақбергеновтер табыс еттi. Байқаудың ынталандыру сыйлығын "Хабар" телеарнасының журналисi Рахат Жақсыбай алса, үшiншi орын — Гүлвира Биғалиқызына, екiншi орын — Мұрат Есжанға бұйырды. Бiрiншi орынды — КТК телеарнасының журналисi Жадыра Сейдеш қанжығасына байлады. Сондай-ақ, марапаттау рәсiмi аясында Бейбiт Құсанбектiң "Ел ағалары" атты кiтабының тұсауы кесiлдi. Бұл еңбекке Б.Құсанбектiң соңғы жылдары жүргiзген сұхбаттары енгiзiлген.

Серіктес жаңалықтары