ادامزاتتىڭ الىبى – مۇحتار اۋەزوۆ

 

120 جىلدىعىن اتاپ وتۋگە بايلانىستى مادەني شارالار جالعاسىن تابۋدا. سونىڭ ءبىر پاراسى رەتىندە شىعىس قازاقستان وبلىسىنىڭ جارما اۋدانىنا قاراستى اۋەزوۆ كەنتىندە ۇلى جازۋشى مۇحتار اۋەزوۆتىڭ ەسكەرتكىشى بوي كوتەردى. 

ەسكەرتكىشتىڭ اشىلۋىنا بىرقاتار قوعام قايراتكەرلەرى، سونىڭ ىشىندە مۇحتار اۋەزوۆتىڭ ۇلى مۇرات اۋەزوۆ تە كەلگەن. زاڭعار جازۋشىنىڭ 120 جىلدىعى وتكەن ايدا اباي اۋدانىندا اتالىپ وتكەن. ءبىرتۋار تۇلعانى جارما اۋدانى دا ۇمىت قالدىرماپتى. اۋدان اكىمى نۇرلان سىدىقوۆتىڭ ايتۋىنشا، جازۋشى كوزى ءتىرى كەزىندە جارما وڭىرىندە بولىپ، اقجال دەگەن كەنىشكە بارىپ، وچەرك جازعان ەكەن. «ەسكەرتكىشتىڭ بوي كوتەرۋىنە دەمەۋشىلىك جاساعان كاسىپكەر ورازحان قاليەۆكە زور العىسىمىزدى بىلدىرەمىز. اۋەزوۆتىڭ رۋحاني مۇرالارى ۇرپاققا دەمەۋ بولىپ، ىزگىلىككە شاقىرىپ كەلەدى. ۋاقىت وتكەن سايىن جازۋشىنىڭ ەڭبەكتەرىنىڭ ماڭىزى ارتا تۇسپەك. ويتكەنى ونىڭ تۋىندىلارى ادامزات دۇنيەسىنە ءتان ماڭگىلىك قۇندىلىقتاردى پاش ەتەدى. اۋەزوۆتەي عۇلامانىڭ شىعارمالارىنان ءنار العان ۇرپاقتىڭ ساناسى سەرگەك، ويى وزىق، رۋحى مىقتى بولماق. بۇگىنگى ءىس-شارا دا وسى ماقساتتى كوزدەيدى»، – دەيدى نۇرلان سىدىقوۆ. اۋدان اكىمى ەسكەرتكىشتىڭ اشىلۋىنا كەلگەن جازۋشىنىڭ ۇلى مۇرات مۇحتار ۇلىنا، عاريفوللا ەسىم تاعى بىرقاتار قوعام قايراتكەرلەرىنە ات مىنگىزىپ، شاپان جاپتى. «بۇگىن بۇل وڭىردە، شىنىمەن، ەرەكشە ماعىنالى وقيعا ورىن الىپ، اۋەزوۆ كەنتىندە ەڭسەلى ەسكەرتكىش بوي كوتەردى. رۋحتانىپ وتىرمىز. جاقىندا عانا مۇحتار اۋەزوۆتىڭ لوندوندا جيناقتارى شىقتى. تاۋەلسىزدىگىمىز بەن ەلدىگىمىزگە مۇحتار اۋەزوۆتىڭ ۇلەسى زور دەپ بىلەمىن»، – دەدى مۇرات اۋەزوۆ.

ۇقساس جاڭالىقتار

Back to top button