تەاتر - ونىڭ عۇمىرى

قازاقستان دراما تەاترلارىنىڭ جىل سايىنعى  تەاتر فەستيۆالى مەملەكەتتىك سىيلىقتىڭ لاۋرەاتى اشىربەك سىعايدىڭ مەرەيتويىنا وراي ۇيىمداستىرىلىپ،  ححV رەسپۋبليكالىق فەستيۆال بارىسىندا بار عۇمىرىن تەاتر ونەرىنە ارناعان سىنشى-قايراتكەردىڭ شىعارماشىلىعىن، مۇرالارىن جاڭعىرتۋ، ەسىمىن ەل ەسىندە ماڭگى قالدىرۋ ماقساتىندا قىركۇيەكتىڭ 9-13 ارالىعىندا استانا قالاسىندا دۇركىرەپ ءوتتى.

فەستيۆالگە  ەكى-ءۇش تەاتر ماۋسىمىندا تۇساۋى كەسىلگەن، تەاتر سىنشىلارىنىڭ جوعارى باعاسىنا يە بولعان ۇزدىك قويىلىمدارىمەن ەلىمىزدىڭ دراما، مۋزىكالىق دراما، مۋزىكالىق-كومەديا، ساتيرا، بالالار مەن جاسوسپىرىمدەر تەاترلارى قاتىستى. ولاردىڭ اراسىندا، اتاپ ايتار بولساق،  رەسپۋبليكالىق ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاس­وسپىرىمدەر تەاترى، اتىراۋ وبلىستىق ماحامبەت اتىنداعى قازاق دراما تەاترى، رەسپۋبليكالىق اكادەميالىق نەمىس دراما تەاترى، اقمولا وبلىستىق ورىس دراما تەاترى، ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى، استانا جاستار تەاترى، شىعىس قازاقستان وبلىسى «داريعا-اي» جاستار تەاترى، «جاس ساحنا» تەاترلارى بار. بەس كۇنگە سوزىلعان ونەر فەستيۆالىن قالا قوناقتارى مەن تۇرعىندارى ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى، «قازاقستان» ورتالىق كونتسەرت زالى مەن جاستار تەاترى ساحنالارىنان تەگىن تاماشالادى. سپەكتاكل بارىسىندا قوعام جانە مەملەكەت قايراتكەرى اشىربەك سىعايدىڭ ءومىربايانى، اتقارعان قىزمەتتەرى جايلى دا دەرەكتەر ۇسىنىلدى. قۇرمانعازى اتىنداعى كونسەرۆاتوريانى بىتىرگەن سوڭ، وسى ونەر ورداسىندا ۇستازدىق قىزمەتكە قالعان اشاعاڭ 1974-1994 جىلدارى رەسپۋبليكا مادەنيەت مينيسترلىگىنىڭ تەاتر ءبولىمىن، ونەر باسقارماسىن باسقارىپ، قازاقستان كپ ورتالىق كوميتەتى مادەنيەت ءبولىمىنىڭ جاۋاپتى قىزمەتكەرى، مادەنيەت ءمينيسترىنىڭ ورىنباسارى،  ءبىرىنشى ورىنباسار، ت.جۇرگەنوۆ اتىنداعى تەاتر جانە كينو ينستيتۋتىنىڭ رەكتورى قىزمەتتەرىن ابىرويمەن اتقارعانىنان حاباردار ەتتى.

عۇمىرىن قازاق تەاتر ونەرىنە ارناعان سىنشىنىڭ قالامىنان تۋعان «ىڭكار شاق»، «سىر ساندىق»، «ساحناعا ساپار»، «جارناما الدىنداعى وي»، «ساحنا ساڭلاقتارى»، «تەاتر تاعلىمى»، «تولعام»، «تالدىقورعان تەاترى»، «وي تورىندە –تەاتر»، «ءان تاعدىر»، «اكتەر الەمى»، «ساحنا الەمى» اتتى كىتاپتارى بۇگىندە ونەر الەمىنە قادام باسقان ستۋدەنت-جاستاردىڭ باعدارشامىنا اينالدى دەسەك، ارتىق ايتقاندىق ەمەس. بۇل قازاق مادەنيەتى مەن ونەرىنە قوسىلعان باعا جەتپەس بايلىق، مول مۇرا!

– اشىربەكتىڭ ءالى دە  تۋعان حالقىنىڭ ونەرىنە قوسارى مول ەدى. جازعانىنان جازارى مول دوسىمىزدىڭ اسا ءبىلىمدار، پاراساتتى ويلارى، قازاق تەاتر ونەرى ءالى دە قۇنارلى شىعارمالارمەن تولىعۋىنا قوسار ۇلەسى دە جەتكىلىكتى بولاتىن. كوزى اشىق، كوكىرەگى وياۋ، قازاقتىڭ ۇلتتىق ونەرى جايلى جازامىن دەپ جۇرگەندەرىن ارا-اراسىندا ايتىپ قويىپ وتىرۋشى ەدى، جازامىن دەيتىن،– دەپ ەسكە الدى جازۋشى تولەن ابدىك.

– اشەكەڭنىڭ ۇقىپتىلىعىنا تاڭ قالاتىنمىن. وتە ءبىلىمدى، ساۋاتتى ەدى. ول دۇنيەجۇزىندەگى مەملەكەتتەردىڭ بارلىعىنىڭ دەرلىك تەاترلارىن، ونداعى اكتەر-اكتريسالاردىڭ عۇمىرنامالارىن، قويعان تۋىندىلارىن شاتاستىرماي، جەكە-جەكە پىكىرىن ءبىلدىرىپ، اشىق سىناپ وتىراتىن-دى. ويتكەنى ءوزى اۋدارمامەن دە اينالىستى عوي. ج.مولەردىڭ «ەرىكسىز ۇيلەنۋ»، ك.گولدونيدىڭ «كۇلكىلى وقيعا»، و.يوسەليانيدىڭ «اربانىڭ ىزىمەن»، ش.روكۆيدىڭ «مازاسىز اجەي» سىندى درامالىق شىعارمالارىن اۋدارىپ، رەسپۋبليكا تەاترلارىندا قويدى. سوندىقتان بولار، كەز كەلگەن ەلدىڭ ونەر تۋىندىلارى جونىندە وزىندىك پىكىرى قالىپتاستى، – دەپ ەسكە الادى جارى كۇلاش سىعاي.

قايتالانباس تۇلعانىڭ مەرەيتويى تەك تەاتر ساحنالارىندا عانا ەمەس، اسەم استانانىڭ قوعامدىق ورىندارىندا دا اتالىپ ءوتىپ جاتتى. ورتالىق كىتاپحانادا مادەنيەت جانە سپورت مينيسترلىگىنىڭ قولداۋىمەن جارىق كورگەن «سىن ساردارى» اتتى كىتاپتىڭ تۇساۋكەسەرى دە وسىنداي يگى شارالاردىڭ ءبىرى.

ءيا، ۇلتىنا- ۇلىسىنا قاراماي، ىزىنەن ەرگەندەرگە ادالدىقتىڭ، تازالىقتىڭ رۋحىن سەزىندىرگەن ءاش-اعاڭ، اشىربەك سىعاي جايلى ءالى تالاي ەستەلىكتەرگە تولى كەشتەر وتەرىنە سەنەمىز.

Back to top button