«نۇرلى  جەر»: باسپانالى  بولۋعا  اشىلعان جول

بيىل «نۇرلى جەر» باعدارلاماسى اياسىندا 10 ميلليون شارشى مەتر باسپانا قولدانىسقا بەرىلەدى. اپتا باسىندا پرەمەر-مينيستر باقىتجان ساعىنتاەۆتىڭ توراعالىعىمەن وتكەن ۇكىمەت وتىرىسىندا «نۇرلى جەر»، «نۇرلى جول» باعدارلامالارىنىڭ 9 ايلىق قورىتىندىلارى تالقىلاندى.

وتىرىستا قارالعان نەگىزگى ماسەلەنىڭ ءبىرى – «نۇرلى جول» باعدارلاماسىن جۇزەگە اسىرۋعا 484،2 ملرد تەڭگە بولىنگەنى. 1 قازانداعى جاعداي بويىنشا، جىلدىق جوسپاردىڭ 65 پايىزى يگەرىلدى. وسىدان كەيىن ۇلتتىق ەكونوميكا ءمينيسترى تيمۋر سۇلەيمەنوۆ «نۇرلى جولدىڭ» ءاربىر باعىتىنا جەكە توقتالدى. ءبىرىنشى باعىت – كولىكتىك-لوگيستيكالىق جانە يندۋستريالدىق ينفراقۇرىلىمدى دامىتۋ. رەسپۋبليكالىق ماڭىزداعى 22 نەگىزگى اۆتوجول جوبالارىن ىسكە اسىرۋعا بيىل 259،8 ملرد تەڭگە كوزدەلگەن. ونىڭ ىشىندە قارجىلاندىرۋ جوسپارىنا سايكەس، 150،4 ميلليارد تەڭگە بەرىلدى جانە ول سوما تولىق كولەمدە يگەرىلدى. «قۇرىق» تەڭىز پورتىنداعى پارومدىق كەشەننىڭ 2-فازاسىنىڭ قۇرىلىسىنا 50 ملرد تەڭگە باعىتتالعان، «قازاقستان تەمىرجولى» سونىڭ 33،4 ملرد تەڭگەسىن يگەرگەن. سونداي-اق، استانا حالىق­ارالىق اۋەجايىنىڭ جولاۋشىلار تەرمينالىنىڭ قوسىمشا ينفراقۇرىلىمىن تۇرعىزۋعا ۇلتتىق قور قاراجاتىنان 5 ملرد تەڭگە بولىنگەن

«نۇرلى جولدىڭ» ەكىنشى باعىتى – جىلۋمەن، سۋمەن جابدىقتاۋ جانە كارىز جۇيەلەرىن جاڭعىرتۋدى قاراستىرادى. 2017 جىلى ۇلتتىق قوردان بۇل باعىتقا 53 ملرد تەڭگە جۇمساۋ جوسپارلاندى. بۇل شامامەن 700 شاقىرىم جۇيەنى رەكونسترۋكتسيالاۋعا جانە جاڭادان سالۋعا مۇمكىندىك بەرەدى.  «جەرگىلىكتى اتقارۋشى ورگاندار تابيعي مونوپوليالار سۋبەكتىلەرىنە (تمس) 44،9 ملرد تەڭگە كولەمىندە بيۋدجەتتىك كرەديتتەر بەردى. جوسپارلانعان جۇيەنىڭ 452 شاقىرىمى سالىندى. بيۋدجەتتىك نەسيەلەندىرۋ شەڭبەرىندە تابيعي مونوپوليالار سۋبەكتىلەرىنىڭ قاراجاتتى يگەرۋ مەرزىمى 2 جىلدى قۇرايدى. بىراق سوعان قاراماستان، ءبىز اكىمدىكتەردەن بولىنگەن قاراجاتتى يگەرۋدى تەزدەتۋ ءۇشىن تمس-تەرمەن جۇمىس جۇرگىزۋدى سۇرايمىز»، – دەدى مينيستر ت.سۇلەيمەنوۆ.

باعدارلامانىڭ ءۇشىنشى باعىتى – ءبىلىم بەرۋ سالاسىنداعى ينفراقۇرىلىمدى دامىتۋ. 2017 جىلى ۇلتتىق قوردان الىناتىن 71،7 ميلليارد تەڭگەگە 109 مەكتەپتى سالۋ جوسپارلانعان. ونىڭ ىشىندە 76 مەكتەپ بيىل پايدالانۋعا بەرىلۋگە ءتيىس. «جەرگىلىكتى بيۋدجەتتەرگە 56،5 ميلليارد تەڭگە اۋدارىلدى، اكىمدىكتەر سونىڭ 53،7 ميلليارد تەڭگەسىن يگەردى. 53 مەكتەپ پەن 2 بالاباقشا ىسكە قوسىلدى. ماڭعىستاۋ،  اقمولا،  جامبىل جانە وڭتۇستىك قازاقستان وبلىستارىندا قاراجات ۋاقتىلى يگەرىلمەگەن. باستى سەبەبى – مەملەكەتتىك ساتىپ الۋ كونكۋرسىنىڭ ناتيجەلەرى بويىنشا سوت پروتسەسىنىڭ سوزىلۋى. قىركۇيەك-قازان ايلارىندا پايدالانۋعا تەك 1 عانا مەكتەپ بەرىلگەن ەكەن. بۇل رەتتە جىل سوڭىنا دەيىن تاعى 21 مەكتەپتىڭ قۇرىلىسى اياقتالۋى قاجەت»، – دەپ ەسكەرتتى ۇلتتىق ەكونوميكا ءمينيسترى. وسى ورايدا ءبىلىم جانە عىلىم مينيسترلىگىنە وڭىرلەرمەن بىرلەسىپ، ءبىلىم بەرۋ وبەكتىلەرىنىڭ ىسكە قوسىلۋىن تەزدەتۋ تاپسىرىلدى.

ءتورتىنشى باعىت – «بيزنەستىڭ جول كارتاسى – 2020» شەڭبەرىندە كاسىپكەرلىك وبەكتىلەرىنە جەتىسپەيتىن ينفراقۇرىلىمدى تارتۋ قولعا الىنۋدا. بۇل ماقساتقا ۇلتتىق قوردان بيىل 10 ميلليارد تەڭگە ءبولۋ كوزدەلگەن. 9 اي قورىتىندىسى بويىنشا جەرگىلىكتى اتقارۋشى ورگانداردىڭ وتىنىمدەرىنە سايكەس، 10 ميلليارد تەڭگەنىڭ تەك 4،4 ميلليارد تەڭگەسى عانا اۋدارىلىپ، ونىڭ 3،5 ميلليارد تەڭگەسى يگەرىلگەن. «وسى باعىت اياسىندا ءبىزدىڭ مينيسترلىك وڭىرلەرمەن بىرلەسىپ، «قارجىلاندىرۋ جوسپارلارىن» قايتا قاراۋ بويىنشا جۇمىس جۇرگىزدى. ناتيجەسىندە، جەلتوقسان ايىنا جوسپارلانعان بارلىق قاراجات قاراشا ايىنا جىلجىتىلدى. بۇل قاراجاتتى يگەرمەۋ تاۋەكەلدەرىن تومەندەتۋگە مۇمكىندىك بەرەدى. وسىعان بايلانىستى قالعان 5،6 ميلليارد تەڭگە وڭىرلەرگە بيىلعى قازان-قاراشا ايلارىندا اۋدارىلادى جانە جىلدىڭ اياعىنا دەيىن تولىقتاي يگەرىلەدى»، – دەپ سەندىردى مينيستر. وسى ارالىقتا.

«نۇرلى جەر» باعدارلاماسى اياسىندا 9 ايدا 7،9 ميلليون شارشى مەتر تۇرعىن ءۇي نەمەسە 69،9 پايىز باسپانا پايدالانۋعا بەرىلگەن. ينۆەستيتسيالار جانە دامۋ ءمينيسترى جەڭىس قاسىمبەكتىڭ مالىمدەۋىنشە، توعىز ايدىڭ قورىتىندىسى بويىنشا تۇرعىن ءۇي قۇرىلىسىنا 591،3 ملرد تەڭگە ينۆەستيتسيا سالىنعان، سونىڭ ىشىندە 108،4 ملرد تەڭگەسى – مەملەكەتتىك ينۆەستيتسيالار. وتكەن جىلمەن سالىستىرعاندا بۇل كورسەتكىش 10 پايىزعا ارتىق.

جالپى تۇرعىن ءۇيدى پايدالانۋعا بەرۋدىڭ جىلدىق جوسپارىنىڭ 78 پايىزى ورىندالعان. بارلىعى 70 مىڭ پاتەر سالىندى. بۇدان وزگە، بيىل ساتىپ الۋ قۇقىعىنسىز بەرىلەتىن ارەندالىق تۇرعىن ءۇي قۇرىلىسىنا 25 ملرد تەڭگە ءبولىندى، جىل سوڭىنا دەيىن 2 697 پاتەر پايدالانۋعا بەرىلەدى. 14 وڭىردە ەكىنشى دەڭگەيلى بانكتەر حالىققا جاڭا تۇرعىن ءۇي ساتىپ الۋعا جەڭىلدىكپەن يپوتەكا بەرە باستاعان.  ال بانكتەرگە 7 ملرد تەڭگەگە 700 ءوتىنىم كەلىپ تۇسكەن، ولاردىڭ ىشىندە 6،6 ملرد تەڭگەگە 650 ءوتىنىم ماقۇلدانعان.

بيىل الماتى وبلىسىندا كەزەكتە تۇرعانداردىڭ سانى 37 مىڭ، ال تۇرعىن ءۇيدى پايدالانۋعا بەرۋ جوسپارى 88 پاتەردى قۇرايدى. قاراعاندى وبلىسىندا 35 مىڭ كەزەكتە تۇرۋشى بار، ال جوسپاردا – 387 پاتەر. ماڭىستاۋ وبلىسىندا كەزەكتە تۇرعاندار سانى – 17 مىڭ، ال پايدالانۋعا بەرۋ جوسپارى – 1 132 پاتەردى قۇرايدى. اتالعان ولقىلىقتى رەتكە كەلتىرۋ تاپسىرىلدى. پرەمەر-مينيستر وڭىرلەردەگى تۇرعىن ءۇي سۇرانىسى مەن قۇرىلىستى جوسپارلاۋ ماسەلەلەرىندەگى ۇيلەسپەۋشىلىكتى رەتتەۋدى جەڭىس قاسىمبەككە تاپسىردى.

 

 

ۇقساس جاڭالىقتار

Back to top button