الاش عىلىمىنا ارنالعان كىتاپ

«عالىمنىڭ حاتى ولمەيدى» دەيدى حالقىمىز. بۇكىل قابىلەتىن ادام ساناسىنا ساۋلە تۇسىرەتىن عىلىمعا ارناپ وتەتىن عالىمداردىڭ ەڭبەگىن باعالاي ءبىلۋدىڭ ادىلدىك ەكەنىن حالقىمىز ءبىر اۋىز سوزگە سىيدىرىپ، اقيقاتىن ايتقان. ۇلتىنىڭ ءتىلى مەن ادەبيەتىن، تاريحىن، ءداستۇر-سالتىن ۇلىقتاپ، شىن مانىندە ۇلتتىڭ كىم ەكەنىن اۋەلى وزىنە تانىتاتىن، سول ارقىلى مەملەكەت بولاشاعىنىڭ جارقىن بولۋىنا قىزمەت ەتەتىن گۋمانيتارلىق سالا عالىمدارىنىڭ شىعارماشىلىق ومىرىندە جاس ۇرپاققا ونەگە بولار تۇستار مول.

ارينە، ءوز ەلىمىزدە دە عالىمدارىمىز سىي-قۇرمەتتەن كەندە ەمەس. ال كورشى ەلدەردە قازاقتان شىققان عالىمداردىڭ مەرەيتويى لايىقتى اتاپ ءوتىلىپ، ونىڭ شىعارماشىلىق ءومىربايانىنا ارنالىپ كىتاپ شىعارىلۋى – قازاق رۋحانياتى ءۇشىن نازار اۋدارارلىق وقيعا.

اباي اتىنداعى قازپي-ءدىڭ (قازىرگى المۋ) تۇلەگى، 40 جىلدان اسا ۋاقىتتان بەرى بەرداق اتىنداعى قاراقالپاق مەملەكەتتىك ۋنيۆەرسيتەتى مەن ءاجىنياز اتىنداعى نوكىس مەملەكەتتىك ينستيتۋتىنىڭ فيلولوگيا فاكۋلتەتتەرىندە قازاق ادەبيەتىنەن قازاق بالالارىنا انا تىلىندە ءبىلىم بەرىپ،  جەمىستى ەڭبەك ەتىپ جۇرگەن فيلولوگيا عىلىمدارىنىڭ كانديداتى، سىنشى-ادەبيەتتانۋشى قايىرجان ارالباەۆ – بۇگىندە اتامەكەننەن سىرتتا جۇرگەن ساناۋلى ادەبيەتشى عالىمنىڭ ءبىرى.

وتكەن جىلى جەتپىسكە تولعان عالىم الماتىداعى «ارىس» باسپاسىنان «بەسقالا ورنەكتەرى» اتتى ادەبي زەرتتەۋ كىتابىن شىعارىپ، مەرەيتويى ءوزى ەڭبەك ەتىپ جاتقان ەلدە لايىقتى اتالىپ وتكەن بولاتىن. بيىل تاشكەنت قالاسىندا وزبەكستان رەسپۋبليكاسى حالىققا ءبىلىم بەرۋ مينيسترلىگىنىڭ بەكىتۋىمەن قايىرجان ارالباەۆتىڭ 70 جىلدىعىنا ارنالعان «اكتۋالنىە ۆوپروسى فيلولوگي» اتتى عىلىمي ماقالالار جيناعى جارىق كورىپ وتىر. عالىمدار ز.شامۋراتوۆا، ي.ديلمانوۆ قۇراستىرعان بۇل كىتاپ فيلوسوفيا عىلىمىنىڭ دوكتورى، پروفەسسور، وزبەكستان عىلىم اكادەمياسىنىڭ اكادەميگى جۇمانازار بازارباەۆتىڭ «ادەبيەتتەر بايلانىسىنىڭ بايسالدى زەرتتەۋشىسى» دەگەن ماقالاسىمەن اشىلعان. ماقالادا ق.ارالباەۆتىڭ وسى ولكەدەن شىققان قازاق قالامگەرلەرىنىڭ، جىراۋلارىنىڭ شىعارماشىلىعىن تەرەڭ زەرتتەگەنى جان-جاقتى دالەلدى دايەكتەرمەن اشىپ كورسەتىلگەن. ەكى تىلدە (قازاق-ورىس) تۇڭعىش رەت جارىق كورىپ وتىرعان سالالىق عىلىمي جيناقتا قايىرجان ارالباەۆتىڭ بىرنەشە عىلىمي ماقالالارى مەن وعان ارنالعان ماقالالار ورىن العان. سول سياقتى اتالعان كىتاپقا فيلولوگيا ماسەلەلەرىنە ارنالعان بىرنەشە اۆتوردىڭ ماقالالارى دا ەنگىزىلگەن.

اتامەكەننەن جىراقتا جۇرسە دە جارتى عاسىردان بەرى ءوزى ءومىر ءسۇرىپ جاتقان ولكەدەگى قازاقتاردىڭ  ادەبيەتى مەن ونەرىن عىلىمي جاقتان نەگىزدەپ، زەردەلى زەرتتەۋلەر جۇرگىزىپ كەلە عالىم قايىرجان ارالباەۆ ءالى تالاي قۇندى كىتاپتار شىعارىپ، ۇلت رۋحانياتىن بايىتۋعا مول ۇلەس قوسا بەرەتىنى انىق.

 

 

 

ۇقساس جاڭالىقتار

Back to top button