قازاق تاۋارىن 110 ەل تۇتىنادى

«بۇگىنگى تاڭدا وڭدەۋشى ونەركاسىپتىڭ قازاقستاندىق ونىمدەرى 110 ەلگە ەكسپورتتالىپ جاتىر. كەيبىر تاۋار پوزيتسياسى بويىنشا وتكىزۋدىڭ تىڭ نارىعى اشىلعان. العاشقى التى ايدا «ازيا-اۆتو» كومپانياسى وندىرەتىن اۆتوكولىكتىڭ 672-ءى قىتاي مەن ءباا-گە جونەلتىلدى. قىتايلىق ارىپتەستەرمەن بىرلەسە قۇراستىرىلعان قوستانايداعى اۆتوكولىكتەر تاجىكستانعا ەكسپورتتالا باستادى. اۋىل شارۋاشىلىعى تەحنيكاسى تۇڭعىش رەت رەسەي نارىعىنا جول تارتتى. لوكوموتيۆتەر ەكسپورتى تاجىكستان مەن ءازىربايجان ەلىنە دە جولعا قويىلىپ، 40-قا جۋىق لوكوموتيۆتى وتكىزدىك. بۇل ءتىزىمدى ودان ارى دا جالعاستىرا بەرۋگە بولادى»، – دەيدى مينيستر.

جەڭىس قاسىمبەكتىڭ ايتۋىنشا، وڭدەلەتىن ونەركاسىپ ونىمدەرىنىڭ مولشەرى اعىمداعى جىلدىڭ قاڭتارى مەن شىلدەسى ارالىعىندا 8،7 ملرد تەڭگەنى قۇراعان. بۇل كورسەتكىش وتكەن جىلعىمەن سالىستىرعاندا 27 پايىزعا ارتىق. سونىمەن قاتار، مينيستر وڭدەۋشى سەكتوردىڭ ۇلەسى 7 اي بويىنشا 32،7 پايىزعا ارتقانىن اتاپ ءوتتى.

«وڭدەۋشى  سەكتوردا باسەكەگە قابىلەتتىلىك ارتىپ كەلەدى. وسىلايشا، 2010-2016 جىلدار ارالىعىندا وڭدەۋشى ونەركاسىپ سالاسىندا ورتا جانە ءىرى كاسىپورىندار بويىنشا ەڭبەك ونىمدىلىگى ەكى ەسەگە ءوسىپ، جان باسىنا شاققاندا 38،9 مىڭ اقش دوللارىنا جەتتى»، – دەدى مينيستر.

ۆەدومستۆو باسشىسى سونىمەن قاتار، يندۋستريالىق دامۋ باعدارلاماسىنىڭ ارقاسىندا جالپى ەكونوميكا مەن ونەركاسىپتىڭ قۇرىلىمى وزگەرىپ كەلە جاتقانىن ايتىپ ءوتتى. «وڭدەۋشى سەكتوردىڭ ەل ەكونوميكاسىنىڭ دامۋىنداعى ۇلەسى 2010 جىلى 11،3 پايىزعا، 2017 جىلدىڭ 7 ايىنىڭ كورسەتكىشى بويىنشا 12 پايىزعا جەتتى. بۇل دەگەنىڭىز، يندۋستريالاندىرۋ باعدارلاماسى، شىنىندا دا، قازاقستاننىڭ ەكونوميكاسىنا اسەرىن تيگىزەتىنىن كورسەتىپ وتىر. وڭدەۋشى ونەركاسىپتىڭ ۇلەسى 2010 جىلى 30،5 پايىزعا، 2017 جىلدىڭ 7 ايى بويىنشا 41،1 پايىزعا ءوستى»، – دەپ ءتۇيدى مينيستر.

 

 

ۇقساس جاڭالىقتار

Back to top button