قازاق پەن قىرعىز پرەمەرلەرى ەرەۆاندا كەزدەستى

بۇگىن ەرەۆاندا  قازاقستان پرەمەر-ءمينيسترى باقىتجان ساعىنتاەۆ پەن قىرعىزستان پرەمەر-ءمينيسترى ساپار يساكوۆتىڭ كەلىسسوزى جالعاستى. كەشە ولار جابىق تۇردە ەكى جاقتى كەلىسسوز وتكىزگەن، دەپ حابارلايدى ورتالىق ازيانىڭ جاڭالىقتار قىزمەتى. 

ساعىنتاەۆ پەن يساكوۆ «ەكى جاقتى ەكونوميكالىق ىنتىماقتاستىق، سونىمەن قاتار شەكاراداعى، كولىكتەگى، فيتوسانيتاريالىق جانە ۆەتەريناريالىق باقىلاۋ، كەدەن جانە سالىق قىزمەتىن باسقارۋ سالالارىنداعى ءوزارا ارەكەت مەسەلەلەرىن ەۋرازيا ەكونوميكالىق وداعى مەن دۇنيەجۇزىلىك ساۋدا ۇيىمىنىڭ ەرەجەلەرى جانە نورمالارىنا ساي» رەتتەيتىن جول كارتاسىنا قول قويۋدى تالقىلاعان.

جول كارتاسىن قۇرۋ تۋرالى كەلىسىم ەكى ەل پرەمەرلەرىنىڭ 18 قازاندا استانادا وتكەن كەزدەسۋىندە جاسالعان. ول كەزدە جول كارتاسىن جاساۋعا ەكى ەل ءبىرىنشى ۆيتسە-پرەمەرلەرىنىڭ باسشىلىعىمەن مينيسترلىكتەر مەن ۆەدومستۆولار باسشىلارىنان جۇمىسشى توبى قۇرىلعان.

10 قازاننان باستاپ قازاقستان تارابى قىرعىز شەكاراسىنان ازاماتتار مەن كولىكتەردى وتكىزۋ ءتارتىبىن كۇشەيتكەن. سونىڭ سالدارىنان قىرعىزستاننىڭ چۋ جانە تالاس وبلىستارىنداعى باقىلاۋ-وتكىزۋ بەكەتتەرىندە ادامدار مەن اۆتوكولىكتەر جينالىپ، ۇزاق ۋاقىت كەزەكتە تۇرۋعا ءماجبۇر بولعان. اسىرەسە تەز بۇزىلاتىن تاعام ونىمدەرىن تاسيتىن ۇلكەن جۇك كولىكتەرىنىڭ جۇرگىزۋشىلەرى قاتتى زيان شەككەن.

ۇقساس جاڭالىقتار

Back to top button