Brexit بويىنشا كەلىسسوزدەر تەرەزا مەيدىڭ كوڭىلىنەن شىقتى

Brexit-كە قاتىستى كەلىسسوزدەر بارىسى ۇلىبريتانيا پرەمەر-ءمينيسترى تەرەزا مەيدىڭ كوڭىلىن كونشىتىپ وتىر. ول قاۋىمداستار پالاتاسى الدىندا ەۋرووداق سامميتىنە جاساعان ساپارى جايلى ەسەپ بەرىپ، بۇل كەلىسسوزدەردىڭ تابىستى وتەتىنىنە سەنىمدىلىك تانىتتى دەپ حابارلادى 24.kz.

سونداي-اق بريتان پارلامەنتى كەلىسىمدى قابىلداۋعا ەۋرووداق ەلدەرىنەن بۇرىن داۋىس بەرەتىنىن دە ايتتى. تەرەزا مەيدىڭ سوزىنشە، Brexit كەلىسسوزدەرىندە سولتۇستىك يرلاندياعا قاتىستى ەلەۋلى ىلگەرىلەۋگە قول جەتكىزىلگەن. ەۋرووداق پەن ۇلىبريتانيانىڭ ادام قۇقىعى تۋراسىنداعى ۇستانىمدارى رەسمي لوندون وداقتان شىققاننان كەيىن دە وزگەرمەيدى.

تەرەزا مەي، ۇلىبريتانيا پرەمەر-ءمينيسترى:

– تاراپتار جەلتوقسان ايىندا ءوزارا مامىلەگە كەلەتىنىنە سەنىمدىمىن. بريتانيا 2019 جىلى ناۋرىزدا ەۋرووداقتان ىرگەسىن اجىراتقاننان كەيىن دە ەۋروپانىڭ سەنىمدى سەرىكتەستىگى بولىپ قالا بەرەدى.

ال ەۋروپالىق كوميسسيا توراعاسى جان-كلود يۋنكەر: «كەلىسسوزدەردى جالعاستىرماس بۇرىن لوندون Brexit-ءتىڭ وتەماقىسىن تولەۋى ءتيىس»، – دەدى.

رەسمي بريۋسسەل ۇلىبريتانيا وداقتان شىققانى ءۇشىن 60-پەن 100 ملرد ەۋرو ارالىعىنداعى قارجى بەرۋى ءتيىس دەگەندى العا تارتىپ وتىر. بىراق بۇعان دەيىن تۇماندى البيونداعىلار وتەماقى تەك 20 ملن ەۋرو كولەمىندە بولۋى مۇمكىن ەكەنىن ايتقان.

 

ۇقساس جاڭالىقتار

Back to top button