انكارادا قازاق سۋرەتشىلەردىڭ كورمەسى اشىلدى

انكارادا قازاقستان مادەنيەتى كۇندەرى اياسىندا قازاقستاندىق سۋرەتشىلەر گۇلمارال تاتتىباەۆا مەن ناتاليا باجەنوۆانىڭ FriendShip اتتى كورمەسى اشىلدى، دەپ حابارلايدى قازاقپارات.

كورمەگە قويىلعان ءتۇرلى جانرلارداعى شىعارمالاردىڭ تاقىرىبى ورتاق. كوشپەندىلەر وركەنيەتىنىڭ سيمۆولى رەتىندە الىنعان ساياحات كەمەسى مۇنداعى تۋىندىلاردىڭ ىشكى بىرلىگىن ۇيىتىپ وتىر. كوركەم ەكسپوزيتسيا اۆتورلارىنىڭ ءبىرى ناتاليا باجەنوۆانىڭ ايتۋىنشا، كورمە اتاۋىنا FriendShip ءسوزىنىڭ الىنۋىندا رامىزدىك ماعىنا بار.

«كورمەمىز كەمە يدەياسىنان تۋىندايدى. كەمە الدىنان شىققان كەدەرگىلەرگە مويىماستان، قوزعالىسىن توقتاتپايدى، العا قاراي جۇزە بەرەدى. ونىڭ بۇل قاسيەتىن كوشپەندىلەر ومىرىمەن دە ساباقتاستىرۋعا بولادى، ويتكەنى ۇشى-قيىرى جوق ۇلى دالانى بەسىك ەتكەن حالىقتىڭ دا ءومىرى ۇنەمى قوزعالىستا»، – دەيدى ول.

«تاقىرىپتىق شىعارمالاردان تىس، كورمەگە تۋعان ولكەنىڭ تابيعات بوياۋلارى سىڭدىرىلگەن ناتيۋرمورتتار دا قويىلدى. تۇركياداعى وسى كورمە ءۇشىن قىرۋار جۇمىس اتقارىلدى، ونى جۇزەگە اسىرۋعا قولعابىس ەتكەن مينيسترلىك پەن تۇركياداعى ەلشىلىككە ەرەكشە العىسىمىزدى بىلدىرەمىز».

قازاقستاننىڭ مادەنيەت جانە سپورت ۆيتسە-ءمينيسترى اقتوتى رايىمقۇلوۆانىڭ ايتۋىنشا، كورمەگە ۇسىنىلعان تۋىندىلار قازاقستان مادەنيەتىنىڭ ءبىر كورىنىسى. «سۋرەتشى قىزدارىمىزدىڭ ەكەۋى دە كوپپەرزەنتتى انا بولۋىنا قاراماستان ۇلتتىق مادەنيەتىمىزدى ناسيحاتتاۋدا تالماي ەڭبەك ەتىپ كەلەدى. ولاردىڭ شىعارمالارىنان قازىرگى زاماننىڭ جاڭعىرعان ونەر ەلەمەنتتەرىنىڭ قازاقتىڭ ءداستۇرلى تىگىنشىلىك جانە توقىما ونەرىمەن ۇندەستىگى ايقىن اڭعارىلادى»، – دەدى اقتوتى رايىمقۇلوۆا.

 

ۇقساس جاڭالىقتار

Back to top button