تاريحي ورىنداردا وتكىزىلەتىن ءپان

بۇدان بىلاي استانادا تاريح جانە گەوگرافيا پاندەرى مۇراجايدا وتەتىن بولادى. وقۋشىلار تاپجىلماي وتىراتىن سىنىپتان الشاقتاپ، تاريحي جادىگەرلەردى ءوز كوزىمەن كورىپ، عاسىرلار قويناۋىنا ساياحات جاساي الادى. بۇل  – وقۋشىلارعا «بولاشاققا باعدار: رۋحاني جاڭعىرۋ» اياسىنداعى  «تۋعان جەر» باعدارلاماسىنىڭ تۇپكى ءمانىن، ماڭىزىن ءتۇسىندىرۋ ءۇشىن تاپتىرماس مۇمكىندىك.

«تۋعان جەر» باعدارلاماسىنىڭ باستى باعىتتارىنىڭ ءبىرى – ءبىلىم بەرۋ سالاسىندا اۋقىمدى ولكەتانۋ جۇمىستارىن جۇرگىزۋ. سوندىقتان تاريحي جانە مادەني ورىندارعا ساياحات ۇيىمداستىرۋ مەكتەپكە جۇكتەلىپ وتىر. باعدارلاما اياسىندا «قازاقستان تاريحى»، «گەوگرافيا» جانە «قازاق ادەبيەتى» پاندەرى بويىنشا ساباقتاردى مۋزەيلەردە، مادەنيەت مەكەمەلەرىندە جانە تاريحي ورىنداردا وتكىزۋ جوسپارلانعان.

استانانىڭ ءبىلىم باسقارماسى ماماندارىنىڭ پىكىرىنشە، وقۋشىلار تاجىريبە ارقىلى ناقتىلانعاندا عانا تەوريا تۇرعىسىنان العان بىلىمدەرىن نىعايتا الادى. 2017-2018 وقۋ جىلىندا «ماڭگىلىك ەل» يدەياسى مەكتەپ باعدارلاماسىنا اكادەميالىق پاندەر، زەرتتەۋ مەن ساباقتان تىس وقىتۋلار، قوسىمشا ءبىلىم بەرۋ، تاڭدامالى كۋرستار ارقىلى ەنگىزىلەدى. سونىمەن قاتار جاڭا وقۋ جىلىندا استانا مەكتەپتەرىندە 46 روبوتەحنيكا كابينەتى اشىلماق. «20-دان استام ەلوردالىق مەكتەپ روبوتەحنيكا كۋرستارىن ءساتتى جۇزەگە اسىرۋدا. تاعى دا 46 كابينەت جاڭا وقۋ جىلىندا اشىلادى»، – دەدى استانا قالالىق ءبىلىم باسقارماسىنىڭ جەتەكشىسى ءانۋار جانعوزين.

قازىر مەكتەپتە ءبىلىم بەرۋ باعدارلاماسىن سىناۋشىلار كوپ. جەتىستىكتەرىن ايتاتىندار دا از ەمەس. دەسەك تە ءبىلىم بەرۋدىڭ فورماتىنىڭ داۋلى ماسەلەگە ۇلاسقانىنا ءبىراز بولدى. مىسالى، ۇلىبريتانيادا باستاۋىش سىنىپ وقۋشىلارى ۋاقىتىنىڭ كوبىن سىنىپتان تىس جەردە وتكىزەدى. ياعني، ساباقتىڭ تاقىرىبىنا قاراي مۇراجاي، تەاتر، ەسكەرتكىش، ساياباقتارعا بارادى. باستاۋىش سىنىپتىڭ بالالارىنا ۇيگە تاپسىرما بەرىلمەيدى. تەك بالانىڭ قابىلەتى مەن ىنتاسىنا قاراي قوسىمشا ادەبيەت وقۋعا بەرىلىپ، ءوز ويىن اۋىزشا نەمەسە جازباشا ەسسە رەتىندە تاپسىرادى. سول سياقتى تومەنگى سىنىپتىڭ وقۋشىلارىنا باعا قويىلمايدى. بۇل بالالاردى الالاماي، تۇلعالىق قابىلەتىن دامىتۋ ءۇشىن جاسالادى. ولاي بولسا، بالانىڭ ءبىلىمىن قالاي باعالايدى؟ ءار ءتۇرلى زاتتاردان قۇرالعان ويىنشىقتار – جۇلدىزشا، شارشى نەمەسە جانۋارلاردىڭ پىشىندەرى جاقسى وقىعان بالاعا بەرىلەدى. ول وسىلايشا ءوزىنىڭ سىيلىقتارىن جىل سوڭىنا دەيىن جيناپ، وقۋ مەرزىمى اياقتالعاندا ساناپ شىعادى. بۇل جۇيە ەۋروپانىڭ بارلىق مەملەكەتتەرىندە قابىلدانعان. مىنە، وسى جۇيە بىرتىندەپ مەكتەپ باعدارلاماسىنا ەنگىزىلىپ وتىر.

ۇقساس جاڭالىقتار

Back to top button