قىرعىزستانمەن شەكارادا تەكسەرۋدىڭ كۇشەيتىلگەنى حابارلاندى

قازاقستاننىڭ قىرعىزستانمەن شەكاراسىنداعى «قورداي» وتكىزۋ بەكەتىندە شەكارادان وتەتىندەردى تەكسەرۋ كۇشەيتىلگەنى حابارلاندى. كۋاگەرلەر الەۋمەتتىك جەلىلەردە تەكسەرىستىڭ كۇشەيۋىنەن بەكەتتە كەزەك پايدا بولعانىن جازىپ جاتىر. جۋرناليست مارات تولومۋشۋلۋنىڭ ازاتتىقتىڭ قىرعىز رەداكتسياسىنا حابارلاۋىنشا، شەكارادا جۇزدەگەن كولىك كەزەكتە تۇر.

– قازاقستان جاعى شەكارادان ءوتۋدى قيىنداتىپ جىبەردى. تەكسەرىس كۇشەيدى. كولىكتەردىڭ وتە الماي تۇرعانىنا مىنە، ءۇش ساعات بولدى. مۇندا تۇرعان ادامدار ءۇش ساعاتتان بەرى كۇتىپ تۇرعانىن ايتادى. شەكاراشىلار ءتۇسىندىرىپ جاتقان جوق. تەك شەكارادان ءوتۋ ءتارتىبى ازداپ قيىنداعانىن ايتىپ جاتىر، – دەدى مارات تولومۋشۋلۋ.

شەكارانىڭ قىرعىزستان جاعىنداعى «اقجول»، قازاقستان جاعىنداعى «قورداي» بەكەتى بىشكەكتەن 25 كيلومەتر قاشىقتىقتا ورنالاسقان جانە ول ەكى ەل اراسىنداعى نەگىزگى وتكىزۋ بەكەتى سانالادى.

قىرعىزستان مەملەكەتتىك شەكارا قىزمەتىنىڭ ءباسپاسوز حاتشىسى سالكىن ابدىكاريەۆا قازاقستان جاعىندا شەكارادان ءوتۋ قيىنداعانىن راستاعانىمەن، ازىرگە ونىڭ سەبەپتەرى بەلگىسىز ەكەنىن ايتتى.

– مەن ساعات 18:30-دا (10 قازان كۇنى) بايلانىسقا شىقتىم. ءبىزدىڭ شەكاراشىلار ءوزىمىز جاقتان كەزەك مۇلدەم جوعىن حابارلادى. قازاقستاننان بەرى ءوتىپ جاتقانداردى قازاقستاندىقتاردىڭ ۇزاق تەكسەرىپ جاتقانىن، ءتىپتى كولىكتەرىنە دەيىن قاراپ جاتقانىن ايتتى. قازاق جاعىنىڭ ءبىزدىڭ ازاماتتارىمىزعا ايتۋىنا قاراعاندا، ولاردا تەكسەرىس كۇشەيتىلگەن. بىراق قازاقستان جاعى ءبىزدى ءتارتىپ كۇشەيتىلگەنى جونىندە رەسمي تۇردە ەسكەرتكەن جوق. ولاردىڭ بۇلاي ىستەۋگە قۇقىعى بار. ولار بىزگە ەسكەرتىپ، يا ەسكەرتپەي ءتارتىپتى كۇشەيتۋگە حاقى بار. ەگەر ولار ءبىزدى رەسمي تۇردە ەسكەرتپەسە، ءبىز باسقا ەل شەكاراشىلارىنىڭ ءىس-قيمىلىنا تۇسىنىك بەرە المايمىن. قىرعىزدار جاعىنان شەكتەۋ دە، كەدەرگى دە جوق، – دەدى ابدىكاريەۆا.

قازاقستان ۇلتتىق قاۋىپسىزدىك كوميتەتى شەكارا قىزمەتىنىڭ ءباسپاسوز قىزمەتى ازاتتىق ءتىلشىسىنىڭ «قوردايداعى» جاعدايعا قاتىستى ساۋالىنا ساۋال جولداۋدى سۇرادى.

«قورداي» تەكسەرۋ-وتكىزۋ بەكەتىنەن كۇن سايىن 25 مىڭ ادام جانە ەكى مىڭعا جۋىق كولىك وتەدى. قازاقستاندىق تۋريستەر ىستىقكول جاعالاۋىنا دەمالۋعا باراتىن جاز مەزگىلىندە شەكارادان وتەتىندەر سانى ونداعان مىڭنان اسىپ كەتەدى.

 

Back to top button