تاستەمبەكوۆ 40-قا كەلگەن ءانشىنى قول استىنا الدى

بەلگىلى پروديۋسەر ەريك تاستەمبەكوۆتىڭ مۋزىكالىق جوبالارى بۇگىندە ەسىمى ەلگە تانىمال انشىلەر. ادەتتە جاس ونەرپازداردى قول استىنا الاتىن پروديۋسەر ەندى 40-قا قادام باسقان ونەر يەسىنە قولداۋ كورسەتپەك. بۇل تۋرالى نتك ارناسىنىڭ “رەۆيۋ” باعدارلاماسىندا ايتىلدى.

وتاندىق شوۋ-بيزنەستە تالاي تالانتتاردىڭ جۇلدىزىن جاققان تاستەمبەكوۆتىڭ تاڭداۋى بۇل جولى نۇرلان جۇماعالي ەسىمدى انشىگە ءتۇسىپتى. ولاردىڭ تانىستىعى وسى جىلدىڭ كوكتەمىندە باستالعان. اراعا بىرنەشە اي سالىپ، قوس تاراپ كەلىسىمشارتقا دا قول جەتكىزەدى.

«مۋزارتتىڭ ستيلىندە ءان سالاتىن بولادى. رەپەرتۋارعا دا ءوزىنىڭ جاسىنان ساي كەلەتىن ترەكتەردى تاڭداۋدى ءجون دەپ شەشتىك. بۇل جىگىتتىڭ جانى ليريكاعا جاقىن!» – دەيدى تاستەمبەكوۆ.

قىرىققا تاقاعان شاعىندا ءان الەمىنە قادام باسقان نۇرلان وسى ۋاقىتقا دەيىن وتاندىق كينونارىقتا قىزمەت اتقارىپتى. ول ءوزىن قامال الار جاستا كاسىبي ساحناعا جولداما العان جالعىز مەن ەمەس دەپ جۇباتادى.

«مىسالى، بىلاي قاراپ تۇرساڭىز مىنا كورشى مەملەكەتتە بار. ونىڭ ىشىندە ستاس ميحايلوۆ 40-تان اسىپ كەتكەن سوڭ، ساحناعا شىققان.  تاعى ايتا كەتەتىن بولساق گريگوري لەپس! ول كىسىدە 40-تان اسىپ بارىپ ونەرگە كەلگەن»، – دەيدى نۇرلان جۇماعالي.

ءانشىنىڭ سوزىنە سەنسەك، ۇزاق ۋاقىت پىسىق پروديۋسەرلەردى اڭدۋمەن بولعانىن ايتادى. بۇگىندە ەريكپەن قىزۋ جۇمىسقا كىرىسكەن نۇرلاننىڭ باستاپقىدا تاڭداۋى تاستەمبەكوۆكە تۇسپەگەن…

«بايان حانىم بولدى. بىراق، بايان حانىم وزدەرىڭىز بىلەسىزدەر، ەر انشىلەرمەن كوپ اينالىسپايدى. ەكىنشىسى ەندى ول ارمان دۇيسەنوۆ اعامىز، بىراق ول كىسىدە بىلاي كەتىپ قالدى. سوسىن ەندى ءۇشىنشى ۆاريانت وسى ەريك اعامىز بولدى»، – دەيدى نۇرلان.

«ءبىر كۇنى ءوزى حابارلاسىپ، داۋىسىن تىڭداپ كورۋگە ۇسىنىس جاسادى. مەنىڭ كوڭىلىمنەن شىققاننان كەيىن، جۇمىستى باستاپ كەتتىك. وسى ۋاقىتقا دەيىن ءان ايتۋ باعىتىن تاڭداپ، ءستيلىن ساراپتاپ، بۇگىن بەينەبايان تۇسىرۋگە بەل بۋدىق!» – دەيدى تاستەمبەكوۆ.

ەكى جاستىڭ بايانسىز ماحابباتىن سۋرەتتەيتىن سۋ جاڭا كليپ «ادال بول» دەپ اتالاتىن ترەككە تاسپالانىپ جاتىر!

ۇقساس جاڭالىقتار

Back to top button