قىرعىزستاندا پرەزيدەنت سايلاۋىنا 10 ملن دوللار شاماسىندا اقشا بولىنگەن

قىرعىزستاندا پرەزيدەنت سايلاۋىنا 10 ملن دوللار شاماسىندا اقشا بولىنگەن. قىرعىزستاندا پرەزيدەنت سايلاۋىنا 670 ملن سوم (شامامەن 10 ملن اقش دوللارى) قاراستىرىلعان. بۇل جونىندە قاۋىپسىزدىك كەڭەسىنىڭ وتىرىسىندا ايتىلدى.

قىرعىز پرەزيدەنتى اپپاراتىنىڭ اقپاراتتىق ساياسات ءبولىمىنىڭ حابارلاۋىنشا، ەل باسشىسى المازبەك اتامباەۆتىڭ توراعالىق ەتۋىمەن وتكەن كەڭەستە ورتالىق سايلاۋ كوميسسياسىنىڭ ءتورايىمى نۇرجان شايلدابەكوۆا بايانداما جاساعان. ول سايلاۋدىڭ دايىندىق جۇمىستارىنا جانە وتكىزۋگە مەملەكەت قازىناسىنان 670 ملن سوم بولىنگەنىن حابارلادى. ءبىرىنشى كەزەڭگە 538 ملن سوم قاراستىرىلعان، ال قالعان قاراجات ەكىنشى كەزەڭ ءوتۋ قاجەتتىلىگى تۋىنداعاندا جۇمسالادى.

وسك باسشىسى سايلاۋشىلاردىڭ تولىق ءتىزىمى 5 قازاندا بەلگىلى بولاتىنىن ايتتى. ول سونىمەن بىرگە داۋىستى ساناۋ باعدارلاماسىنىڭ جەتىلدىرىلگەنىن اتاپ ءوتتى.

«جۇيە اۆتوماتتاندىرىلعان، ادامداردىڭ ارالاسۋىنسىز جۇمىس ىستەيدى. سىرتقى كۇش ارقىلى سايلاۋ ناتيجەسىن وزگەرتۋ مۇمكىن ەمەس»،- دەپ اتاپ ءوتتى وسك ءتورايىمى.

قىرعىزستاندا پرەزيدەنت سايلاۋى 15 قازاندا وتەدى.

ۇقساس جاڭالىقتار

Back to top button