مولدوۆادا زەينەتكە 63 جاستان باستاپ شىعادى

مولدوۆادا زەينەتكەرلىك جاس ۇلعايتىلاتىن بولدى،  – دەپ حابارلايدى 24.kz ارناسى.

ويتكەنى ەندى 18 جىلدان كەيىن مۇنداي ساناتتاعىلار سانى حالىقتىڭ 25 پايىزىنا جەتەتىن ءتۇرى بار. باسقاشا ايتقاندا، ەڭبەك ەتەتىندەر مەن زەينەتاقى الاتىن ەگدە جاستاعىلاردىڭ جالپى سانى تەڭەسكەلى تۇر. 50 اقش دوللارى. بۇل – مولدوۆا ەلىندەگى ەڭ تومەنگى زەينەتاقى مولشەرى. ەگەر شۇعىل وزگەرىستەر ەنگىزىلمەسە، ول تاعى 10 پايىزعا تومەندەۋى مۇمكىن. ال الىس بولاشاقتا، تىپتەن زەينەتاقى جۇيەسىنىڭ قۇردىمعا كەتۋ قاۋىپى بار. سوندىقتان جەرگىلىكتى ۇكىمەت زەينەتاقى جاسىنا قاتىستى ەرلەرگە 1 جىل، ال ايەلدەرگە 6 جىل قوسۋدى جوسپارلاپ وتىر. ياعني كەلەشەكتە بارلىعى تەك 63 جاستا عانا زەينەتكەر اتانا الادى.

«63 جاستاعى نەمەسە 34 جىلدىق ەڭبەك ءوتىلى بار ادام زەينەتكە شىعادى. سونىمەن قاتار زەينەتاقىنى تولەۋ جۇيەسىنە دە بىرقاتار وزگەرىس ەنگىزىلمەك. ياعني ول ادامنىڭ ەڭبەك اقىسى مەن ساقتاندىرۋ جارنالارىنىڭ كولەمىنە تىكەلەي بايلانىستى بولادى»، – دەيدى ەڭبەك، الەۋمەتتىك قورعاۋ جانە وتباسى مينيسترلىگى باسقارماسى باسشىسى نەليا رۋسۋ.

بۇعان قوسا زەينەت جاسىنا جەتكەندەرگە، ەگەر ءوز قالاۋى بولسا، جۇمىسىن جالعاستىرۋعا دا مۇمكىندىك بەرىلەدى. ماسەلەن اناتولي دەمچەنكو قازىر 62 جاستا. ال ەڭبەك ءوتىلى 40 جىلعا جۋىقتادى. كەيىپكەرىمىز كەلەر جىلى جۇمىسىن جاساي بەرۋىنە بولادى. ەڭبەكاقىمەن قوسا زەينەتاقىنى دا الادى.

بۇل رەفورمادان ەسەسىن جوعالتاتىندار دا بار. ول – سۋديالار، پروكۋرورلار مەن ۇكىمەت مۇشەلەرى. ولار بۇرىن 50 جاستان زەينەتكە شىعاتىن جانە جالاقىنىڭ 55 پايىزى كولەمىندە زەينەتاقى الاتىن. ەندى قاراپايىم ادامدارمەن تەڭەستىرىلەدى.

 

ۇقساس جاڭالىقتار

Back to top button