Головкин - Альварес кездесуінің төрешілері белгілі болды

АҚШ-тың Невада штатындағы Атлеттер комиссиясы 16 қыркүйекте Лас-Вегаста қазақстандық Геннадий Головкин мен мексикалық Сауль «Канело» Альварес арасында өтетін жекпе-жекке реферилерді тағайындады,  – деп хабарлайды 24.kz арнасы. Шаршы алаңда жүріп төрелік ететін америкалық тәжірибелі рефери Кенни Бейлис болды. Жекпе-жекте америкалық төрешілер бригасы қызмет атқарады: Эделейд Берд, Дэйв Моретти (екеуі де Невада штатынан) және Дон Трелла (Коннектикут). Кейбір фанаттар: «Жекпе-жекті төрешілер шешетін болса, Лас-Вегаста Головкинге жеңісті бермеуі мүмкін», – дейді. Олардың қауіпіне себеп бар. 2014 жылы Лас-Вегаста Альварес Эрисланди Ларамен өткізген жекпе-жегінде тең түскен еді. Алайда төрешілер жеңісті мексикалыққа беріп жіберді. 2013 жылы Мейвезермен өткен кездесуде бір төреші тең ұпай берген, бірақ Мейвезердің басымдылығы айқын болған еді. Айта кетейік, Головкин – «Канело» жекпе-жегі 16 қыркүйек күні Лас-Вегастағы (АҚШ, Невада) T-Mobile Arena аренасында өтеді. Сауль «Канело» Альвареске қарсы жекпе-жекте Геннадий Головкин орта салмақта WBC, WBA (Super), IBF және IBO чемпиондық атақтарын қорғайды. Мексикалық «The Ring» журналының белбеуін бәске тігеді.

Серіктес жаңалықтары