استاناعا العاش رەت نيكولاس مادۋرو كەلدى

ۆەنەسۋەلا پرەزيدەنتى نيكولاس مادۋرو العاش رەت قازاقستانعا كەلدى. مارتەبەلى مەيماندى ەلىمىزدىڭ ەنەرگەتيكا ءمينيسترى قانات بوزىمباەۆ استانا اۋەجايىندا قارسى الدى، دەپ حابارلايدى قازاقپارات.

بۇعان دەيىن ەكونوميكالىق اقپاراتتار اگەنتتىگى نيكولاس مادۋرونىڭ قازاقستاندا وتەتىن يسلام ىنتىماقتاستىق ۇيىمىنىڭ سامميتىنە قاتىساتىندىعىن حابارلاعان بولاتىن.

«تاياۋ كۇندەرى 57 مەملەكەتتىڭ باسىن قوساتىن يسلام قوعامداستىعىنىڭ قازاقستاننىڭ ەلورداسى استانادا وتەتىن حالىقارالىق كەزدەسۋىنە بارامىن. مەن وپەك-كە مۇشە جانە مۇشە ەمەس بارىنشا ماڭىزدى ەلدەردىڭ باسشىلارىمەن ەكىجاقتى قارىم-قاتىناستى قولداۋعا نيەتتىمىن»، – دەگەن ەدى مادۋرو ۇلتتىق قۇرىلتايشىلىق جيىن سەسسياسىندا.

سونىمەن قاتار ول يىۇ ءسامميتىن مۇناي باعاسىن تۇراقتاندىرۋعا باعىتتالعان فورمۋلاسىن ۇسىنۋعا مۇمكىندىك بەرەتىن الاڭ رەتىندە قارايتىندىعىن ايتقان ەدى.

سونداي-اق بۇگىن توگو پرەزيدەنتى فورا گنەسسينبەنىڭ ۇشاعى ەلوردا اۋەجايىنا كەلىپ قوندى. مارتەبەلى مەيماندى ەلىمىزدىڭ دەنساۋلىق ساقتاۋ ءمينيسترى ەلجان ءبىرتانوۆ پەن استانا قالاسى اكىمىنىڭ ءبىرىنشى ورىنباسارى سەرگەي حوروشۋن كۇتىپ الدى. بۇعان دەيىن حابارلانعانداي، 10-11 قىركۇيەك كۇندەرى ەلورداداعى تاۋەلسىزدىك سارايىندا ەلباسى نۇرسۇلتان نازارباەۆتىڭ توراعالىعىمەن يسلام ىنتىماقتاستىق ۇيىمىنىڭ عىلىم مەن تەحنولوگيا جونىندەگى ءبىرىنشى ءسامميتى وتەدى. سامميتكە يىۇ-عا مۇشە ەلدەردىڭ، سونىمەن قاتار حالىقارالىق جانە وڭىرلىك ۇيىمداردىڭ 80-گە جۋىق دەلەگاتسياسى قاتىسادى.

 

ۇقساس جاڭالىقتار

Back to top button