اتىراۋ وبلىسىندا نارەستەلەر ءولىمى ارتتى

اتىراۋ وڭىرىندە نارەستەلەر ءولىمى ارتتى، دەپ حابارلايدى استانا ارناسى.

جىل باسىنان بەرى 69 ءسابي شەتىنەگەن. بۇل بىلتىرعى كورسەتكىشتەن 2 جارىم پايىزعا جوعارى. وبلىستىق دەنساۋلىق ساقتاۋ باسقارماسىنداعىلار وسىلاي دەپ وتىر. كەرىسىنشە، انالار ءولىمى ازايعان.

ماماندار، سابيلەردىڭ شەتىنەۋىنە نارەستەلەردىڭ شالا تۋىلۋى مەن جۇكتى ايەلدەردىڭ دەر كەزىندە ەسەپكە الىنباۋى سەبەپ، دەيدى. انالار دەنساۋلىعىنىڭ السىزدىگىنەن بالالار شالا تۋىلاتىن كورىنەدى. پەرزەنتحانالاردا بىلىكتى مامانداردىڭ تاپشىلىعى دا جاعدايدى كۇردەلەندىرىپ وتىرسا كەرەك.

دەنساۋلىق ساقتاۋ باسقارماسى نارەستەلەر ءولىمىن بولدىرماس ءۇشىن ارنايى جوسپار ازىرلەپ جاتىر. ەندى مەديتسينالىق مەكەمەلەردىڭ باسشىلارى اتتەستاتسيادان وتەدى. وڭىرگە تاجىريبەلى ماماندار تارتۋ قاراستىرىلعان. قازىرگى تاڭدا مەيىربيكەلەر ءۇي-ءۇيدى ارالاپ، جۇكتى ايەلدەر ءتىزىمىن جاساپ جاتىر.

«كۇن سايىن ەسەپكە الىنباعان جۇكتى ايەلدەردى انىقتاۋ ءۇشىن جۇرگىزىلگەن شارا تۋرالى مەديتسينالىق مەكەمە باسشىلارى ەسەپ بەرەدى. وسىلايشا، الداعى جىلعا تۋ ەسەبىن جاساپ، دەر كەزىندە مەديتسينالىق كومەك كورسەتۋ كوزدەلگەن. جانە اياعى اۋىر ايەلدىڭ دەنساۋلىعى مەن بالانىڭ جاعدايىن باعالاپ، باقىلايتىن بولامىز»، – دەيدى اتىراۋ وبلىستىق دەنساۋلىق ساقتاۋ باسقارماسىنىڭ باسشىسى مانشۇك ايمۇرزيەۆا.

ۇقساس جاڭالىقتار

Back to top button