Ұлытау облысында есірткінің заңсыз айналымына қарсы күрес және оның алдын алу бағытында кешенді жұмыстар жүргізіліп жатыр, деп хабарлайды turkystan.kz.
"Кибернадзор" жүйесі арқылы есірткіні таратуға қатысты тыйым салынған ақпарат жарияланған 2 631 интернет-ресурс анықталып, оларға қолжетімділік шектелді. Сонымен қатар жедел іс-шаралар нәтижесінде есірткінің заңсыз айналымына қатысы бар үш топтың жолы кесіліп, 388 келіден астам есірткі тәркіленді. Есірткінің таралу жолдары әртүрлі.
Заңсыз заттар өңірге сырттан жеткізіліп қана қоймай, интернет арқылы да насихатталып, тұрғын үйлердің қабырғалары мен қоғамдық орындарда жарнамалануы мүмкін. Сондықтан оған қарсы күрес нақты жеткізу арналарына тосқауыл қоюмен қатар, заңсыз ақпаратты анықтау мен жоюды да қамтиды. Бұл жұмысқа полиция қызметкерлерімен бірге еріктілер де атсалысып жүр.
Олар аулаларды, аялдамаларды және ғимараттардың қасбеттерін аралап, есірткі жарнамасы бар жазуларды анықтап, оларды жоюға қатысады. Өткізілген 11 акция барысында осындай 125-ке жуық жазу мен граффити өшірілді. Жалпы, еріктілермен бірлесіп 32 профилактикалық іс-шара ұйымдастырылып, оған 120-ға жуық адам қатысты. Олардың жұмысы қоғамдық орындардағы заңсыз жарнаманы жоюмен ғана шектелмейді.
Бұл — тұрғындардың ортақ қауіпсіздікке жауапкершілікпен қарап, есірткінің таралуына қарсы күреске үлес қосуының нақты көрінісі. Өңірдегі профилактикалық жұмыстар 45 мыңнан астам адамды қамтыды. Осы бағытта барлығы 908 іс-шара өткізілді. Оның ішінде мектептерде, колледждер мен жоғары оқу орындарында 300-ге жуық кездесу мен түсіндіру жұмысы ұйымдастырылды. Жастарға есірткінің зияны, заңсыз айналымға қатысудың құқықтық салдары түсіндірілді.
Іс-шараларға білім беру және денсаулық сақтау ұйымдарының, сондай-ақ қоғамдық бірлестіктердің өкілдері де тартылды. Профилактикалық жұмыстар рейдтік іс-шаралармен де толықтырылып келеді. Жұма және сенбі күндері полиция қызметкерлері мүдделі органдардың өкілдерімен, кеңес мүшелерімен және еріктілермен бірлесіп, ойын-сауық орындары мен компьютерлік клубтарды тексереді. Есептік кезеңде жүзден астам рейд өткізілді.
Тексеру барысында түнгі уақытта заңды өкілдерінсіз жүрген кәмелетке толмағандарға және олардың құқыққа қайшы әрекеттерге тартылу қаупіне ерекше назар аударылады. Есірткінің заңсыз жеткізілу арналарына тосқауыл қою бағытында да бірқатар нәтижеге қол жеткізілді.
Наурыз айында оңтүстік өңірден келген бес адамнан тұратын топ ұсталып, олардан 302 келіден астам есірткі тәркіленді. Қарағандыдан Ұлытау облысына синтетикалық есірткі жеткізу арнасының жолы кесіліп, 1,5 келі синтетикалық зат алынды.
Ал тамыз айында ұсталған тағы бір топтан 40 келіге жуық марихуана тәркіленді. Жалпы, есептік кезеңде облыста есірткіге қатысты 63 құқық бұзушылық тіркелді. Бұғатталған интернет-ресурстар, жойылған жарнамалық жазулар мен тәркіленген есірткі — атқарылған жұмыстың нақты нәтижелері.
Алайда басты мақсат — заңсыз айналымға тосқауыл қоюмен қатар, әсіресе жастардың есірткіге әуестенуінің алдын алу. Бұл бағыттағы жұмыс полиция қызметкерлерінің, мемлекеттік органдардың, қоғамдық ұйымдардың және бейжай қарамайтын азаматтардың бірлескен күш-жігерімен жалғасып келеді.
