Норвегия бастауыш сынып оқушыларының оқу кезінде генеративті жасанды интеллектіні пайдалануына шектеу қойды. Тамыздың аяғында күшіне енген жаңа тәртіп бойынша 1-7-сынып оқушылары ЖИ құралдарын, жалпы ереже бойынша, қолданбауға тиіс, деп хабарлайды turkystan.kz euronews.com-ға сілтеме жасап.
Маусымда жарияланған талап 6-13 жас аралығындағы балаларды қамтиды. 14-16 жастағы оқушылар генеративті ЖИ-ді тек мұғалімнің бақылауымен пайдалана алады. Ал 17-19 жастағы жастарға технологияны жоғары білім мен еңбек нарығына дайындық мақсатында дұрыс қолдануды үйрету көзделген.
Норвегия премьер-министрі Йонас Гар Стёренің айтуынша, ЖИ-ді ойланбай пайдалану балалардың оқу үдерісіндегі маңызды кезеңдерді аттап өтуіне әкелуі мүмкін. Үкімет әсіресе оқу, жазу және математиканың бастапқы дағдыларын өз бетінше меңгеруге басымдық беріп отыр.
Норвегия бұған дейін мектептерде смартфондарды пайдалануды да шектеген. Сонымен қатар билік планшеттерге тәуелділікті азайтып, қағаз кітаптар мен қолмен жазуға қайта назар аударуды жоспарлап отыр. Бұл туралы Reuters хабарлады.
Қыркүйектің басында Нью-Йорк қаласы да мемлекеттік мектептерде оқушыларға арналған генеративті ЖИ жүйелеріне бір жылдық мораторий жариялады. Шектеу мектепке дейінгі топтардан бастап 8-сыныпқа дейінгі 600 мыңға жуық баланы қамтиды.
Қала билігі қауіпсіздік талаптарына сәйкес келмейтін 38 білім беру бағдарламасындағы ЖИ қызметтерін өшіреді. Адаммен эмоционалдық байланыс орнатуға арналған серік-чат-боттарды барлық сыныпта пайдалануға тыйым салынады.
Мұғалімдер ЖИ-ді сабақ жоспарын дайындауға қолдана алады, бірақ оқушылардың жұмысын бағалау мен дағдарыстық жағдайларды шешуді технологияға тапсыра алмайды. Жоғары сыныптарда мұғалім бақылауымен өтетін шағын сынақ жобалары ұйымдастырылып, оқушыларға жылына екі рет ЖИ сауаттылығы сабақтары жүргізіледі. Associated Press мәліметінше, бұл — АҚШ-тағы мектептерге енгізілген ең ауқымды шектеулердің бірі.
Италия өзге тәсілді таңдады. 2025 жылы қабылданған заң бойынша 14 жасқа толмаған балалар ЖИ технологияларын ата-анасының немесе заңды өкілінің келісімімен ғана пайдалана алады. Бұл талап тек мектепке емес, балалардың ЖИ жүйелеріне қол жеткізуіне жалпы қолданылады.
Еуропалық одақтың ЖИ туралы заңы білім саласындағы кейбір жүйелерді жоғары қауіп санатына жатқызады. Оған оқуға қабылдау, емтиханды бақылау және білім нәтижесін бағалау үшін мекемелер қолданатын технологиялар кіреді. Алайда оқушының үй тапсырмасын орындау үшін жалпыға қолжетімді чат-ботты пайдалануына одақ көлемінде тікелей тыйым салынбаған.
Заңның 4-бабы ЖИ жүйелерін қолданатын ұйымдарға қызметкерлерінің жеткілікті деңгейде ЖИ сауаттылығын қамтамасыз ету міндетін жүктейді. Бірақ балалардың чат-боттарды сабақта пайдалану тәртібін әр ел мен мектеп жүйесі әзірге өз бетінше белгілеп отыр. Норвегия Еуропалық одаққа кірмесе де, оның шешімі аймақтағы білім беру саясатына қатысты пікірталасты күшейтті.
