Биыл Ақтөбе облысында жол апатынан 41 адам қаза тауып, 1 201 адам түрлі жарақат алған. Бұл өңірде жол қауіпсіздігі мәселесінің өте өзекті екенін көрсетеді. Жол-көлік оқиғаларының алдын алу – полицияның ғана емес, жол қозғалысына қатысушы тараптардың бәріне ортақ міндет. Осыны көлік жүргізушілердің есіне тағы бір рет салу үшін Ақтөбе облысында 29 маусым күні ішкі істер саласының ардагерлері жолға шығып, профилактикалық іс-шара өткізді.
Полиция қызметкерлерімен бірге жолға шығып, көлік жүргізушілеріне қауіпсіздік туралы айтқан 30 ардагердің бәрі әр жылдары ішкі істер саласында қызмет еткен. Қазір зейнет демалысына болса да жол қауіпсіздігі мәселесіне немқұрайлы қарай алмайтын олар профилактика кезінде әсіресе, тәжірибесі аз жас жүргізушілерге ерекше мән берді.
– Көлік жүргізу тұрғысынан тәжірбиесі аз жас жүргізушілер жол апатына жиі ұшырайтынын ресми деректен көріп отырмыз. Өзгелердің өміріне қауіп төндіріп, жол-көлік оқиғаларына себепкер болатын да солар. Сондықтан жастарға ағалық ақылымызды айтып, тілеулестігімізді білдірдік, – дейді ішкі істер саласының ардагері Нұрбай Төлеу.
Жол қозғалысы ережелерін сақтау, жолда өзара сыйластықтың болуы, мас күйінде көлікке отырмау, қауіпсіздік белгісін үнемі тағу – сырт көзге тым қарапайым көрінгенімен, жол бойында адам өмірі мен денсаулығын сақтаудың негізгі қағидалары. Полиция ардагерлері профилактика кезінде осы ережелерді көлік жүргізушілерінің есіне салып, қауіпсіздік ережелерін көпке ұғынықты тілде, достық пейілмен түсіндірді.
Қазақ қоғамында ақсақалдардың сөзі әрдайым өтімді болған. Себебі өмірлік тәжірибесі мол, елдің салт-дәстүрі мен әдет-ғұрпын білетін олардың кеңесі жастарға бағдар беріп, қоғамдағы бірлік пен тәртіптің сақталуына ықпал етеді. Әсіресе, жол қауіпсіздігі сияқты маңызды мәселеде «айналайын» деп басталатын әңгіме ескертуден гөрі жанашырлық сипат алатыны аян. Сол себепті ардагерлер қатысқан профилактикалық іс-шара жүргізушілер тарапынан да қолдау тапты.
– Көшеде жол инспекторының көлік тоқтатуы ешкімге де таңсық емес. Ал әкеңдей адамның «Айналайын, абайла! Үйде бала-шағаң күтіп отыр» деп айтуы кәдімгідей ой салады екен. Былай қарасаңыз, ақсақалдардың айтып тұрғаны бәріміз білетін қарапайым ереже. Бірақ үлкенге құрмет көрсету деген нәрсе санамызға әбден сіңіп қалған ғой. Сондықтан да бұл көпшілікке өтімді іс-шара болды, – дейді жас жүргізуші Дәурен Нұғыманов.
Ақтөбе облыстық полиция департаментінің ардагерлер кеңесіне жалпы саны 3 040 зейнеткер мүше. Олардың арасында тәлімгер ретінде учаскелік пункттерге бекітілген, отбасындағы жанжал кезінде жұбайларды бітімге шақырым, арағайындық жасайтын белсенді ардагерлер аз емес. Ардагерлер кеңесінің төрағасы Ырғызбай Кенжеханов зейнет демалысындағы әріптестерінің жол қауіпсіздігі мәселесіне де немқұрайлы қарай алмайтынын айтады.
Ақтөбе облыстық полиция департаментінің мәліметінше, биылдыққа облыс жолдарында 853 жол-көлік оқиғасы тіркеліп, 41 адам қаза тапқан. Жол апатына ұшыраған 1 201 адам түрлі дәрежедегі дене жарақатын алған. Олардың арасында мүгедек болып қалғаны да аз емес.
Жанна КӨПЖАНОВА,
Ақтөбе
