Нидерландыдағы Далтонс мейрамханасы әлемдегі ең қымбат бургерлердің бірін ұсынады. «The Golden Boy» деп аталатын ерекше тағамның бағасы 5 мың еуроға жетеді, деп хабарлайды turkystan.kz guinnessworldrecords.com-ға сілтеме жасап.
Бургерді аспаз Робберт Ян де Вен әзірлеген. Оның басты ерекшелігі – тоқашының сырты 24 караттық алтын жапырақшамен қапталған. Сонымен қатар қамыры шампан қосылып дайындалады.
Тағамның ішіне жапондық жоғары сапалы вагю сиырының етінен жасалған котлет салынады. Бургердің құрамына қымбат әрі сирек ингредиенттер енгізілгендіктен, оның құны бірнеше мың еуроға бағаланған.
«The Golden Boy» алғаш рет 2021 жылы мейрамхана мәзіріне енгізілген. Қымбат бағасына қарамастан, бұл бургер әлемдік рекордтар тізіміне еніп, ерекше гастрономиялық өнім ретінде танымал болды.
Мамандардың айтуынша, мұндай тағамдар күнделікті тұтынуға емес, сән-салтанат пен ерекше тәжірибені бағалайтын клиенттерге арналған.
