Жердің айналу жылдамдығы кейінгі 3,6 миллион жылдағы ең жоғары қарқынмен баяулап бара жатыр. Бұл туралы BBC Science Focus басылымы хабарлады, деп хабарлайды turkystan.kz.
Зерттеуді University of Vienna мен ETH Zurich ғалымдары жүргізді. Олар мұхит түбінде тіршілік еткен біржасушалы теңіз ағзаларының қазбаға айналған қабықтарын зерттеген. Осы деректердің көмегімен теңіз деңгейінің өзгерістері анықталып, Жердің айналу жылдамдығындағы ауытқулар есептелді.
Зерттеу нәтижесіне сәйкес, соңғы 3,6 миллион жыл ішінде Жердің айналуы дәл қазіргі кезеңдегідей жылдам қарқынмен баяуламаған.
Ғалымдардың пікірінше, бұл құбылыс климаттың өзгеруіне байланысты полярлық мұздықтардың еруімен байланысты. Мұздықтар еріген кезде су мұхиттарға құйылып, экватор маңына қарай қайта бөлінеді. Соның салдарынан планетадағы массаның таралуы өзгеріп, Жердің өз осінен айналу жылдамдығына әсер етеді.
Мамандар бұл үдеріс бірден байқалмайтынын, алайда ұзақ мерзімді перспективада уақытты есептеу жүйелеріне және Жердің динамикасын зерттеуге ықпал етуі мүмкін екенін айтты.
