Адам күніне орта есеппен 16 мыңға жуық сөз айтады. Алайда ғалымдар бірнеше күн бойы әдейі үнсіз қалудың миға әсері ерекше екенін анықтаған. Зерттеулерге сәйкес, тыныштық пен сөйлемеу тек демалыс емес, жүйке жүйесін «қайта жандандыратын» құрал болуы мүмкін, деп хабарлайды turkystan.kz.
Алғашқы күндері ағза бұл өзгеріске бірден бейімделе алмайды. Сөйлеу тоқтаған кезде ми ым-ишара, мимика, жазу сияқты балама байланыс тәсілдерін іздей бастайды.
Бұл кезеңде: стресс гормоны кортизол деңгейі жоғарылайды; ой ағымы күшейіп, ішкі «диалог» пайда болады; есту қабілеті жақсарып, бұрын байқалмаған дыбыстар анық естіледі.
Сонымен қатар зерттеулер көрсеткендей, тыныштық мидың маңызды бөлігі гиппокамп жұмысына оң әсер етеді. Дәл осы аймақта жаңа нейрондар түзілуі мүмкін, бұл есте сақтау қабілетін жақсартуға ықпал етеді.
Үшінші-төртінші күнге қарай жағдай өзгере бастайды. Көп адам мазасыздықтың азайғанын және зейіннің жақсарғанын байқайды. Бұл мидың тыныш күйде белсенді болатын жүйесінің қайта реттелуіне байланысты. Бұл кезде стресс деңгейі төмендейді; бір нәрсеге жақсырақ ден қоя бастаймыз; эмоцияларды түсіну қабілеті артады.
Аптаның аяғына қарай әсері тереңдей түседі, эмоциялық тұрақтылық қалыптасады, ойлау айқындалып, күрделі мәселелерді шешу жеңілдейді, ұйқы мен жүрек ырғағы жақсарады.
Дегенмен, мамандар маңызды ескерту жасайды: мұндай нәтижелер тек ерікті түрде және қауіпсіз ортада байқалады. Егер адам мәжбүрлі түрде оқшауланса немесе әлеуметтік қолдаудан айырылса, керісінше күйзеліс күшеюі мүмкін.
Қорытындылай келе, бір апта үнсіздік мистикалық тәжірибе емес, жүйке жүйесін қалпына келтірудің бір тәсілі. Тыныштық мидың жұмысын жақсартып, стрессті азайтады. Бірақ ең бастысы – үнсіздікті қалай қолданатыныңызда, саналы түрде, өзіңізді түсінуге бағытталған тыныштық ең тиімді нәтиже береді.
