Кәсіпкерлікке бейімділік тек білім мен мүмкіндіктерге ғана емес, адамның мінез-құлқына да тығыз байланысты. Acta Psychologica журналында жарияланған жаңа зерттеу нарциссизм мен психопатияға тән кейбір қасиеттер ересектер арасындағы кәсіпкерлікке ұмтылыстың маңызды көрсеткіші бола алатынын көрсетті, деп хабарлайды turkystan.kz.
Ғалымдар 26 жастан 76 жасқа дейінгі 591 кеңсе қызметкері мен өзін-өзі жұмыспен қамтыған адамды зерттеген. Нәтижесінде, жеке ісін жүргізетін адамдардың көбіне батыл, тәуекелден қорықпайтын және өзін жоғары бағалауға бейім болатыны анықталған. Мұндай қасиеттер сәтсіздіктерден тез қалпына келуге және белгісіз жағдайларда шешім қабылдауға көмектеседі.
Зерттеу авторлары кәсіпкерлікті тек бизнес ашумен шектемей, мүмкіндіктерді байқай білу және оларды іске асыру қабілеті ретінде қарастырады. Осы тұрғыдан алғанда, кәсіпкерлік – мамандық қана емес, тұлғалық ерекшелік. Бұл әлеует қазіргі таңда бизнесі жоқ адамдарда да болуы мүмкін екенін көрсетеді.
Бұған дейін ғалымдар көбіне «Үлкен бестік» (экстраверсия, ашықтық, ұқыптылық, тіл табыса білу, нейротизм) моделіне сүйеніп келген. Алайда жаңа зерттеу «қара үштік» деп аталатын қасиеттерге, атап айтқанда нарциссизм, макиавеллизм және психопатияға көбірек назар аударды. Бұл мінез белгілері тәуекелге бару, жоғары нәтижеге ұмтылу және дербестікке құштарлық сияқты кәсіпкерлікке тән сипаттармен қабысады.
Зерттеушілердің айтуынша, мұндай қасиеттер міндетті түрде теріс нәтиже береді деуге болмайды. Дұрыс бағытта қолданылса, олар инновацияға, жаңа жобаларға және экономикалық құндылық жасауға жол ашуы мүмкін.
