Ақтөбеде 39 жастағы әйел бұрынғы сүйіктісімен болған жанжал соңы қылмыстық іспен аяқталды, деп хабарлайды turkystan.kz.
Ақтөбелік әйел өз үйінде үш таныс ер адаммен бірге спирттік ішімдік ішкен, олардың бірі — оның бұрынғы сүйіктісі болған. Екі ішімдес жолдасы дүкенге шығып кеткен кезде, әлгі ер адам пәтер иесіне жақындап, оны мойнынан ұстаған, осылайша оның жақындық қалайтынын білдірген. Ашуға булыққан үй иесі пышақты алып, ер адамды ішінен сұғып алған. Жәбірленуші ауруханаға жеткізілді, ал әйел сот алдына тартылды.
Жәбірленуші сотта шынында да айыпталушымен болған қарым-қатынасты есіне түсіріп, сол күні оны қайталағысы келгенін, сондықтан оны мойны мен белінен ұстағанын мойындады. Ол сотқа өзін кешіретінін айтып, қатаң жаза қолданбауды сұрады.
Айыпталушы болса, бұрынғы сүйіктісінің өзін агрессивті ұстағанын: мойнынан ұстап, тұншықтырғанын және шешіндіруге тырысқанын айтты. Оның сөзінше, пышақпен соққы беру — өзін-өзі қорғау әрекеті болған, ол өмірі үшін қорқып, ауыр жарақат салуды мақсат етпеген. Ол өзін бас бостандығынан айырмауды өтінді.
Сот әйелді орташа қауіпсіздік деңгейіндегі колонияда 3 жылға бас бостандығынан айыруға үкім шығарды, алайда кәмелетке толмаған баланы тәрбиелеп отырғандықтан, жазаны алты айға кейінге шегерді. Сондай-ақ сот оны алкоголизмнен емделуге міндеттеді.
