Полиция құстарды қоректендіру кезінде жағалауда тазалық сақтауға қойылатын талаптарды бұзбауды сұрайды, деп хабарлайды turkystan.kz.
Қалалық полиция басқармасы тұрғындар мен қала қонақтарына теңіз жағалауында, әсіресе аққулар мен басқа да құстарды тамақтандыратын орындарда тазалық сақтаудың маңызын еске салды.
Құқық қорғау органдарының айтуынша, теңіз жағасында серуендегеннен кейін пакеттер, нанның орамдары және пластик ыдыстар қалып қояды. Мұндай қалдықтар жағалаудың көркін бұзып қана қоймай, құстарға және қоршаған ортаға да қауіп төндіреді.
«Қала тұрғындары мен қонақтарын тазалық сақтау талаптарына түсіністікпен қарауға шақырамыз. Құстарды қоректендірген кезде өзіңізден кейін қалған қоқысты жинап, арнайы белгіленген орындарға тастаңыздар», — деп мәлімдеді полиция.
Құқық сақшылары бұл бағыттағы профилактикалық жұмыс жалғасатынын айтты.
