АҚШ-та әлеуметтік желілер темекімен теңестіріле бастады. Нью-Йорк штаты «тәуелді ететін цифрлық ленталарды» реттейтін жаңа заң қабылдап, платформаларды әр ашқан сайын ми мен психикаға зиян тигізуі мүмкін екенін ескертуге міндеттеді, деп хабарлайды turkystan.kz.
Заңның нысанасына шексіз скроллинг, бейненің автоматты түрде қосылуы және алгоритмге негізделген ленталар ілікті. Бұл талап TikTok, YouTube, Instagram Reels, X (бұрынғы Twitter) секілді ірі сервистердің барлығына дерлік әсер етеді. Биліктің уәжі қарапайым: дәл осы функциялар пайдаланушыларды, әсіресе жасөспірімдерді, ұзақ уақыт экранға «байлап» қояды.
Нью-Йорк губернаторы Кэти Хокулдың айтуынша, мәселе тек экран уақытымен шектелмейді. Билік бұл тетіктерді психикалық денсаулыққа қауіп төндіретін жүйелі фактор деп санайды. Заң «тәуелді ететін лента» ұғымын нақтылап, авто-плей мен шексіз айналдыруды ресми түрде сол санатқа енгізді.
Орындалуын штаттың бас прокуроры бақылайды. Әрбір бұзушылық үшін 5 мың долларға дейін айыппұл салу көзделген. Бұл Big Tech үшін аса ірі сома емес, бірақ реттеуші сигнал айқын: әлеуметтік желілер енді тек технология емес, қоғамдық денсаулық мәселесі ретінде қарастырыла бастады.
Цифрлық платформалар үшін бұл болашақтағы қатаң реттеудің алғашқы ескертуі болуы мүмкін. Егер темекі қаптамасындағы ескертулер бір кездері қалыпты құбылысқа айналса, енді дәл сондай хабарламалар смартфон экранынан да көрінуі ғажап емес.
