АҚШ Мемлекеттік департаменті Қазақстан мен Америка Құрама Штаттары арасындағы авиация саласындағы ынтымақтастықтың маңызын ресми түрде атап өтті, деп хабарлайды turkystan.kz.
Мемлекеттік «Қазаэронавигация» кәсіпорны ұлттық әуе қозғалысын басқару жүйесін ауқымды жаңғыртуға кірісіп, америкалық Leidos компаниясымен жасалған 19 жылдық келісім аясында SkyLine-X платформасына көшуді бастады. Аталған жоба Қазақстан мен АҚШ арасындағы жоғары технологиялы ынтымақтастықтың негізгі үлгілерінің бірі саналады және Вашингтонда өткен Қазақстан Президенті Қасым-Жомарт Тоқаев пен АҚШ Президенті Дональд Трамптың кездесуі барысында ресми түрде атап өтілді.
Келісімді дайындау соңғы жылдардағы сала үшін ең күрделі процестердің бірі болды және дипломатиялық жұмысты, сараптамалық бағалауды әрі институционалдық кемелділікті талап етті. Келісім шарттарының келісіліп, жобаның ілгерілеуіне «Қазаэронавигация» бас директоры Фаат Фаритович Богдашкин елеулі үлес қосты.
«Қазақстан өңірдегі ең ауқымды әуе кеңістіктерінің бірін басқарады, ал жүйенің сенімділігі – қауіпсіздіктің басты факторы. Жаңғырту бізге сенімді түрде алға жылжуға және қызмет көрсету сапасын әлемдегі жетекші орталықтар деңгейінде қамтамасыз етуге мүмкіндік береді», – деді Фаат Фаритович.
АҚШ тарапы да Мемлекеттік департаменттің ресми материалдарында бұл жобаның маңызын атап өтіп, оны авиация, цифрлық технологиялар және көлік инфрақұрылымына салынған инвестициялармен қатар стратегиялық серіктестікті тереңдетудің маңызды элементі ретінде атады. SkyLine-X платформасына көшу аэронавигациялық инфрақұрылымды кешенді жаңартуды көздейді. Бұл жабдықтарды жаңғыртуды, әуе кеңістігін автоматтандырылған мониторингтеуді, маршруттарды дәлірек болжауды және диспетчерлік орталықтар арасындағы үйлестіру сапасын арттыруды қамтиды.
«Қазаэронавигация» РМК – Қазақстан Республикасының азаматтық авиациясына аэронавигациялық қызмет көрсететін мемлекеттік кәсіпорын. Компания 2025 жылы құрылғанына 30 жыл толуын атап өтеді. Кәсіпорын елдің авиация саласындағы жүйе құраушы ұйым болып табылады және әуе қозғалысын басқаруға, ұшу қауіпсіздігін қамтамасыз етуге, халықаралық стандарттардың сақталуына және Қазақстанның әуе кеңістігінің тұрақты жұмысына жауап береді. Көптеген жылдар бойы кәсіпорын өзін-өзі қаржыландыратын әрі қаржылық тұрғыдан тұрақты ұйым ретінде навигациялық жабдықтарды жаңғыртуға, үдерістерді цифрландыруға, инфрақұрылымды дамытуға және авиациялық персоналды даярлауға өз қаражатын инвестициялап келеді.
