Дзюдодан Ұлттық құраманың жаттықтырушы-кеңесшісі Роберт Мшвидобазде Елдос Сметовке қатысты пікір білдірді, деп хабарлайды 1bol.kz.
Шетелдік маманның айтуынша, Париж Олимпиадасынан кейін ресми жарыстарға қатыспаған балуанды әзірге бапкерлер мазалап жатқан жоқ көрінеді. Бұл туралы ол ҰОК-нің ресми сайтына берген сұхбатында айтты.
«Елдос келесі жылы татамиге оралады. Оны ешқайда асықтырмаймыз. Спорттық бабына еніп, қалпына келген соң ғана қай жарысқа қатысатынын бірге ақылдасып шешеміз. Біздің басты мақсатымыз - Олимпиада, Азия ойындары және өз жерімізде өтетін әлем чемпионаты. Осы үш басты доданың барлығына біз 100 пайыз дайын боламыз», - деді ол.
Өткен жылдың соңында дзюдодан ұлттық құраманың бапкерлер құрамы ауысып, жаттықтырушы-кеңесшісі Роберт Мшвидобазде бекітілген болатын. Ол баптаған ұлттық құрама балуандары Азия мен әлем чемпионатында алтын жүлде иелене алмады.
Бұған дейін Елдос Сметов жаттығуға кіріскенін мәлімдеді. Олимпиада чемпионы бабына келген соң халықаралық жарыстарда күресуді бастамақ.
