Өзбекстанда Технологияларды дамыту орталығының ғалымдары алғаш рет ел тұрғындарының гендерін терең зерттеп, әлемде бұрын белгісіз болған ондаған жаңа гендік мутацияларды анықтады, деп хабарлайды turkystan.kz.
Тест нәтижелері бойынша зерттеуге қатысқан әр екінші баладан генетикалық мутация табылған. Кейбір балаларда бір уақытта бірнеше тұқым қуалайтын аурудың белгілері байқалған. Балалардың 86 пайызы кем дегенде бір "бұзылған" геннің тасымалдаушысы болып шықты. Бұл көрсеткіш халықаралық нормадан екі есе жоғары екені атап өтілді. Зерттеушілер мұндай жағдайды елдің кейбір өңірлерінде туыстар арасындағы некелердің жиі кездесуімен түсіндірді.
Ғалымдардың айтуынша, генетикалық мутациялар сирек кездесетін тұқым қуалайтын аурулардың ғана емес, сонымен қатар қант диабеті, жүрек-қан тамырлары және онкологиялық аурулар сияқты кең таралған сырқаттардың даму қаупін де арттырады.
«Біз алғаш рет халқымыздың гендерінің шынайы көрінісін көрдік. Егер балалардың басым бөлігінде жасырын тұқым қуалайтын мутациялар болса, профилактика мен генетикалық кеңес беру жүйесінсіз бұл үдерісті тоқтату мүмкін емес. Сондықтан некеге дейінгі жұптарды скринингтен өткізу бағдарламаларын енгізу өте маңызды», – деді Технологияларды дамыту орталығының директоры және «Өзбекстанның 1000 геномы» жобасының жетекшісі Шахло Турдикулова.
Өзбекстан ғалымдары алған деректер халықаралық мәліметтер базасына енгізілгені туралы Жоғары білім, ғылым және инновациялар министрлігі хабарлады.
