Кейде өзге адамның сүлгісін немесе қырыну құралын пайдалану ұсақ-түйек нәрсе болып көрінеді. Алайда дәрігерлер мұндай әдеттің салдары ауыр болуы мүмкін екенін айтады. Зерттеулерге сүйенсек, бактериялар мен вирустар матада, пластикте және металл беттерінде апталап, тіпті жылдап өмір сүре алады, деп хабарлайды turkystan.kz.
Мамандар ең қауіпті үш затты атады – сүлгі, тіс щеткасы және қырыну құралы. Бұл заттар терімен және шырышты қабықтармен тікелей жанасатындықтан, патогендер оңай тарайды.
Мысалы, АҚШ-та жүргізілген зерттеу кезінде ортақ сүлгіні пайдаланған спортшылардың стафилококк инфекциясын жұқтыру қаупі сегіз есе жоғары болған. Ал тіс щеткалары арқылы герпес, Эпштейн–Барр және гепатит С вирустары берілуі мүмкін.
Қырыну құралдары да ерекше қауіп төндіреді: тіпті кішкентай жараның өзі вирустар мен бактерияларға жол ашады. Бір құралды қолданғаннан папиллома вирусын жұқтыру ықтималдығы өте жоғары.
